ഡബ്ലിൻ: അയർലൻഡിലെ ഇന്ത്യൻ സമൂഹത്തെ നടുക്കിക്കൊണ്ട്, തലസ്ഥാനമായ ഡബ്ലിൻ നഗരത്തിൽ വെച്ച് ഇന്ത്യൻ യുവതിക്ക് നേരെ വംശീയപരമായ വാക്കാൽ അതിക്രമം നടന്നതായി റിപ്പോർട്ട്. ഒക്ടോബർ 9-ന് വൈകുന്നേരം തെരുവിൽ വെച്ച് ഒരു ഐറിഷ് വനിത സ്വാതി വർമ്മ എന്ന യുവതിയെ തടഞ്ഞുനിർത്തി കടുത്ത ഭാഷയിൽ അധിക്ഷേപിക്കുന്നതിന്റെ വീഡിയോ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്.
വംശീയ വിദ്വേഷം നിറഞ്ഞ ചോദ്യങ്ങളിലൂടെയും ആക്രോശങ്ങളിലൂടെയുമാണ് അക്രമണകാരി യുവതിയെ നേരിട്ടത്. “നിങ്ങൾ എന്തിനാണ് അയർലൻഡിൽ വന്നത്?”, “ഇന്ത്യയിലേക്ക് മടങ്ങിപ്പോകുക” എന്നീ ആവശ്യങ്ങൾ ആവർത്തിച്ച ഐറിഷ് വനിത, രാജ്യത്ത് താമസിക്കാനുള്ള സ്വാതി വർമ്മയുടെ അവകാശത്തെയും ചോദ്യം ചെയ്തു.
ഇതിനിടെ, താൻ ഇവിടെ ജോലി ചെയ്യുകയും കൃത്യമായി നികുതി അടച്ച് രാജ്യത്തിന്റെ സമ്പദ്വ്യവസ്ഥയ്ക്ക് സംഭാവന നൽകുകയും ചെയ്യുന്ന വ്യക്തിയാണെന്ന് സ്വാതി വർമ്മ ശാന്തമായി മറുപടി നൽകാൻ ശ്രമിക്കുന്നുണ്ട്. എന്നാൽ അക്രമണകാരിയായ സ്ത്രീ പ്രകോപനപരമായ സംസാരം തുടരുകയായിരുന്നു.
വ്യാപക പ്രതിഷേധവും നിയമനടപടിയും
സംഭവത്തിന്റെ വീഡിയോ ദൃശ്യങ്ങൾ വൈറലായതോടെ, ഇന്ത്യൻ സമൂഹത്തിൽ നിന്നും ലോകമെമ്പാടുമുള്ള പ്രവാസികളിൽ നിന്നും കടുത്ത പ്രതിഷേധമാണുയരുന്നത്. വർമ്മയ്ക്ക് പിന്തുണ പ്രഖ്യാപിച്ചുകൊണ്ട് നിരവധി പേർ രംഗത്തെത്തി. രാജ്യത്ത് വർധിച്ചുവരുന്ന വംശീയതയും വിദേശീയരോടുള്ള വിദ്വേഷവും ഈ സംഭവം വീണ്ടും ചർച്ചാ വിഷയമാക്കി മാറ്റി.
തനിക്ക് നേരിട്ട ദുരനുഭവത്തിൽ മനംനൊന്ത്, യുവതി സംഭവത്തെക്കുറിച്ച് പോലീസ് സ്റ്റേഷനിൽ പരാതി നൽകിയിട്ടുണ്ട്. സമൂഹമാധ്യമങ്ങളിലൂടെ താൻ ഈ സംഭവം പങ്കുവെച്ചത് സഹതാപം നേടാനല്ലെന്നും, വംശീയതയും വിദ്വേഷവും അയർലൻഡിലെ തെരുവുകളിൽ ഇപ്പോഴും സ്വതന്ത്രമായി വിഹരിക്കുന്നത് തുറന്നുകാട്ടാനാണെന്നും സ്വാതി വർമ്മ പ്രതികരിച്ചു.
കഴിഞ്ഞ കുറച്ച് മാസങ്ങളായി അയർലൻഡിൽ ഇന്ത്യൻ പൗരന്മാർക്ക് നേരെ നടക്കുന്ന അതിക്രമങ്ങളുടെ തുടർച്ചയായാണ് ഈ സംഭവത്തെയും കാണുന്നത്. സുരക്ഷാ ആശങ്കകൾ വർധിക്കുന്ന ഈ സാഹചര്യത്തിൽ, രാജ്യത്തെ ഇന്ത്യൻ സമൂഹത്തിന്റെ സുരക്ഷിതത്വം ഉറപ്പാക്കാൻ അധികൃതർ അടിയന്തരമായി ഇടപെടണമെന്ന് വിവിധ സാമൂഹിക സംഘടനകൾ ആവശ്യപ്പെട്ടിട്ടുണ്ട്.
