തനതായ ഹാസ്യശൈലിയിലൂടെ സോഷ്യൽ മീഡിയയിൽ തരംഗമായി മാറിയ ശരത് ഉണ്ണിത്താൻ (40) അന്തരിച്ചു. അമേരിക്കയിൽ ജോലി ചെയ്തിരുന്ന അദ്ദേഹം അവിടെ വെച്ച് കുഴഞ്ഞുവീണാണ് മരണപ്പെട്ടത്. കഴിഞ്ഞ മാർച്ച് 31-നായിരുന്നു ശരത്തിന്റെ ജന്മദിനം. പിറന്നാൾ ആഘോഷത്തിന്റെ സന്തോഷം മായും മുൻപേ എത്തിയ അപ്രതീക്ഷിത വിയോഗവാർത്ത സുഹൃത്തുക്കളെയും ആരാധകരെയും ഒരുപോലെ ഞെട്ടിച്ചിരിക്കുകയാണ്.
സ്റ്റേജിൽ നിന്ന് സ്ക്രീനിലേക്ക്
ആലപ്പുഴ ജില്ലയിലെ കറ്റാനം മൂന്നാംകുറ്റി വാത്തികുളം സ്വദേശിയായ ശരത് ഒരു മികച്ച മിമിക്രി കലാകാരനായിരുന്നു. കൊച്ചിൻ ഗിന്നസ്, തിരുവനന്തപുരം സരിഗ തുടങ്ങിയ പ്രമുഖ മിമിക്രി ട്രൂപ്പുകളിലൂടെയാണ് അദ്ദേഹം തന്റെ കലാജീവിതം ആരംഭിച്ചത്. സ്റ്റേജുകളിൽ നിന്ന് പിന്നീട് സോഷ്യൽ മീഡിയയിലേക്ക് ചുവടുമാറ്റിയപ്പോൾ അദ്ദേഹം ‘ഗുണ്ട ബിനു’ എന്ന പേരിൽ പരിചിതനായി.
‘ഗുണ്ട ബിനു’ എന്ന വികാരം
വലിയ മീശയും, കട്ടിപ്പുരികവും, കറുത്ത മറുകും, തലയിലെ കെട്ടും—ഈ ലുക്കിൽ ശരത് അവതരിപ്പിച്ച റീൽസുകൾക്ക് ലക്ഷക്കണക്കിന് ആരാധകരാണുള്ളത്. പ്രത്യേകിച്ച് അദ്ദേഹം അവതരിപ്പിച്ച ‘ഓണം വന്നല്ലോ’ എന്ന റീൽ ഏറെ വൈറലായിരുന്നു. അവസാനമായി ട്രംപിനെ ഉൾപ്പെടുത്തി അദ്ദേഹം ചെയ്ത വീഡിയോയും സോഷ്യൽ മീഡിയയിൽ വലിയ ചർച്ചയായിരുന്നു.
പ്രമുഖരുടെ അനുശോചനം
നടി സ്നേഹ ശ്രീകുമാർ അടക്കമുള്ള പ്രമുഖർ അദ്ദേഹത്തിന്റെ വിയോഗത്തിൽ അനുശോചനം രേഖപ്പെടുത്തി. “പ്രിയ കലാകാരൻ അമേരിക്കയിൽ വച്ച് മരണപ്പെട്ടു എന്ന വാർത്ത വേദനയോടെ അറിയിക്കുന്നു” എന്നാണ് സുഹൃത്തുക്കൾ സോഷ്യൽ മീഡിയയിലൂടെ പങ്കുവെച്ചത്. കലയെ ഇത്രമാത്രം സ്നേഹിച്ചിരുന്ന, എല്ലാവരെയും ചിരിപ്പിച്ചിരുന്ന ഒരു വ്യക്തിയുടെ മടക്കം കലാലോകത്തിന് വലിയൊരു നഷ്ടം തന്നെയാണ്.
