ഡബ്ലിൻ: അയർലൻഡിലെ ഇൻഫർമേഷൻ ആൻഡ് കമ്മ്യൂണിക്കേഷൻസ് ടെക്നോളജി (ഐ.സി.ടി.) മേഖല വരും വർഷങ്ങളിൽ വൻ വളർച്ചയ്ക്ക് ഒരുങ്ങുമ്പോൾ, ആവശ്യമായ തൊഴിലാളികളെ കണ്ടെത്തുന്നത് രാജ്യത്തിന് ഒരു പ്രധാന വെല്ലുവിളിയായേക്കുമെന്ന് റിപ്പോർട്ട്. ഐറിഷ് ടെക് സ്റ്റാർട്ടപ്പുകളുടെയും വളർന്നുവരുന്ന കമ്പനികളുടെയും സംഘടനയായ ‘സ്കെയിൽ അയർലൻഡ്’ ആണ് ഈ മുന്നറിയിപ്പ് നൽകിയിരിക്കുന്നത്.
2030 ആകുമ്പോഴേക്കും രാജ്യത്തിൻ്റെ ഐ.സി.ടി. മേഖലയിൽ 89,590 പുതിയ തസ്തികകൾ ആവശ്യമായി വന്നേക്കാം എന്നാണ് പഠനം ചൂണ്ടിക്കാട്ടുന്നത്. ഐ.സി.ടി. ബിരുദധാരികളെ സൃഷ്ടിക്കുന്നതിൽ അയർലൻഡ് മികച്ച പ്രകടനം കാഴ്ചവെക്കുന്നുണ്ടെങ്കിലും, ഈ വളർച്ചാ നിരക്കിന് അത് മതിയാകില്ല. അതിനാൽ, നിലവിലുള്ള ജീവനക്കാർക്ക് Reskilling & Upskilling നൽകുന്നത് നിർണ്ണായകമാണ്.
അപ്രൻ്റിസ്ഷിപ്പുകൾ പോലുള്ള പ്രായോഗിക തൊഴിൽ പരിശീലന മാർഗ്ഗങ്ങളിൽ സർക്കാർ കൂടുതൽ ശ്രദ്ധ കേന്ദ്രീകരിക്കണമെന്നും റിപ്പോർട്ട് ശുപാർശ ചെയ്യുന്നു.
ഇന്ത്യൻ പ്രൊഫഷണലുകൾക്ക് സാധ്യതയേറുന്നു
അയർലൻഡിലെ ഐ.സി.ടി. മേഖല കുടിയേറ്റ തൊഴിലാളികളെയാണ് നിലവിൽ വലിയ തോതിൽ ആശ്രയിക്കുന്നത്. ഈ മേഖലയിലെ മൊത്തം ജോലിയുടെ 40% വരെ വിദേശ തൊഴിലാളികളാണ് കൈകാര്യം ചെയ്യുന്നത്.
സോഫ്റ്റ്വെയർ ഡെവലപ്മെന്റ്, ഡേറ്റാ സയൻസ്, ക്ലൗഡ് കമ്പ്യൂട്ടിംഗ്, സൈബർ സുരക്ഷ തുടങ്ങിയ അതിവേഗം വളരുന്ന മേഖലകളിലാണ് ഇന്ത്യൻ പ്രൊഫഷണലുകൾക്ക് മികച്ച അവസരങ്ങൾ ഉള്ളത്.
ആവശ്യമായ പ്രതിഭകളെ രാജ്യത്തേക്ക് ആകർഷിക്കുന്നതിനായി, തൊഴിലവസരങ്ങളെക്കുറിച്ച് ആഗോള തലത്തിൽ പ്രചാരണം നടത്താൻ സർക്കാർ ലക്ഷ്യമിടേണ്ടതുണ്ടെന്നും റിപ്പോർട്ട് പറയുന്നു.
2024-ലെ കണക്കുകൾ പ്രകാരം, 38,000-ൽ അധികം വിദേശ തൊഴിലാളികൾക്ക് അയർലൻഡിൽ തൊഴിൽ പെർമിറ്റുകൾ ലഭിച്ചു. ഇതിൽ ഭൂരിഭാഗവും ഇന്ത്യക്കാരായിരുന്നു എന്നത് ഐറിഷ് ടെക് മേഖലയിൽ ഇന്ത്യൻ പ്രൊഫഷണലുകളുടെ പ്രാധാന്യം എത്രത്തോളമുണ്ടെന്ന് വ്യക്തമാക്കുന്നു.
