കരീബിയനിൽ യുഎസ് ആക്രമണം: മയക്കുമരുന്ന് ബോട്ടിലെ മൂന്നുപേർ കൊല്ലപ്പെട്ടു

വാഷിംഗ്ടൺ ഡി.സി. / കരീബിയൻ – കരീബിയൻ കടലിൽ മയക്കുമരുന്ന് കടത്ത് കപ്പലെന്ന് ആരോപിക്കപ്പെടുന്ന ഒരു ബോട്ടിന് നേരെ യുഎസ് നടത്തിയ ആക്രമണത്തിൽ മൂന്ന് പേർ കൊല്ലപ്പെട്ടതായി പെന്റഗൺ മേധാവി പീറ്റ് ഹെഗ്‌സെത്ത് അറിയിച്ചു. അന്താരാഷ്ട്ര ജലമേഖലയിൽ യുഎസ് നടത്തുന്ന ഇത്തരം ആക്രമണ പരമ്പരകളിലെ ഏറ്റവും പുതിയ സംഭവമാണിത്.

മയക്കുമരുന്ന് കടത്ത് തടയാനുള്ള നടപടിയുടെ ഭാഗമായാണ് യുഎസ് നേവി കപ്പലുകൾ കരീബിയനിലേക്കും F-35 സ്റ്റെൽത്ത് യുദ്ധവിമാനങ്ങൾ പ്യൂർട്ടോ റിക്കോയിലേക്കും വിന്യസിച്ചിരിക്കുന്നത്.

സോഷ്യൽ മീഡിയയിൽ പങ്കുവെച്ച കുറിപ്പിൽ ഹെഗ്‌സെത്ത് ഈ ആക്രമണത്തെ ന്യായീകരിച്ചു. “മറ്റൊരു മയക്കുമരുന്ന് കടത്ത് കപ്പലിന് നേരെയാണ് കരീബിയനിൽ ആക്രമണം നടത്തിയത്. മറ്റ് കപ്പലുകളെപ്പോലെ തന്നെ ഇതും നിയമവിരുദ്ധമായ മയക്കുമരുന്ന് കടത്തിൽ ഏർപ്പെട്ടിരുന്നതായി ഞങ്ങളുടെ രഹസ്യാന്വേഷണ ഏജൻസിക്ക് അറിയാമായിരുന്നു,” അദ്ദേഹം പറഞ്ഞു.

“അന്താരാഷ്ട്ര ജലത്തിൽ നടത്തിയ ഈ ആക്രമണ സമയത്ത് മൂന്ന് പുരുഷ നാർക്കോ-തീവ്രവാദികൾ കപ്പലിൽ ഉണ്ടായിരുന്നു. മൂന്ന് തീവ്രവാദികളെയും വധിച്ചു,” ഹെഗ്‌സെത്ത് കുറിച്ചു. തുടർന്നും മയക്കുമരുന്ന് കടത്തുകാരെ “വേട്ടയാടുകയും… കൊല്ലുകയും” ചെയ്യുമെന്നും അദ്ദേഹം വ്യക്തമാക്കി.

സെപ്റ്റംബർ ആദ്യം ആരംഭിച്ച യുഎസ് സൈനിക നടപടികളിൽ കരീബിയനിലും പസഫിക്കിലുമായി ഇതുവരെ 15-ലധികം ബോട്ടുകൾ ആക്രമിക്കപ്പെടുകയും കുറഞ്ഞത് 65 പേർ കൊല്ലപ്പെടുകയും ചെയ്തതായാണ് റിപ്പോർട്ടുകൾ.

ഇതിനെതിരെ പ്രാദേശിക സർക്കാരുകളും അന്താരാഷ്ട്ര വേദികളും ശക്തമായ വിമർശനം ഉയർത്തിയിട്ടുണ്ട്. കഴിഞ്ഞ വെള്ളിയാഴ്ച യുഎൻ മനുഷ്യാവകാശ മേധാവി വോൾക്കർ ടർക്ക് ഈ ആക്രമണങ്ങൾ നിർത്താൻ യുഎസിനോട് ആവശ്യപ്പെട്ടു. “അന്താരാഷ്ട്ര നിയമത്തിൽ ന്യായീകരണം കണ്ടെത്താൻ കഴിയാത്ത സാഹചര്യങ്ങളിലാണ് ഈ ആളുകൾ കൊല്ലപ്പെട്ടത്. ഈ ആക്രമണങ്ങളും വർദ്ധിച്ചുവരുന്ന മനുഷ്യജീവനുകളുടെ നഷ്ടവും അസ്വീകാര്യമാണ്,” അദ്ദേഹം പ്രസ്താവനയിൽ പറഞ്ഞു.

കൊല്ലപ്പെട്ടവർ അറിയപ്പെടുന്ന മയക്കുമരുന്ന് കടത്തുകാരാണെങ്കിൽ പോലും, ഈ ആക്രമണങ്ങൾ കോടതിക്ക് പുറത്തുള്ള കൊലപാതകങ്ങൾക്ക് (extrajudicial killings) തുല്യമാണെന്ന് വിദഗ്ധർ അഭിപ്രായപ്പെടുന്നു. ആക്രമണം നടത്തിയ കപ്പലുകൾ മയക്കുമരുന്ന് കടത്തുകയായിരുന്നു എന്നതിനോ യുഎസിന് ഭീഷണിയായിരുന്നു എന്നതിനോ ഉള്ള തെളിവുകൾ വാഷിംഗ്ടൺ ഇതുവരെ പരസ്യപ്പെടുത്തിയിട്ടില്ല.

വെനസ്വേലൻ പ്രസിഡന്റ് നിക്കോളാസ് മഡുറോ, യുഎസ് ഈ മയക്കുമരുന്ന് കടത്ത് വിഷയം മുതലെടുത്ത് വെനസ്വേലൻ എണ്ണ പിടിച്ചെടുക്കാൻ കാരാക്കാസിൽ ‘ഭരണമാറ്റം അടിച്ചേൽപ്പിക്കാൻ’ ശ്രമിക്കുകയാണെന്ന് ആരോപിച്ചു. എങ്കിലും, യുഎസ് പ്രസിഡന്റ് ഡൊണാൾഡ് ട്രംപ് വെനസ്വേലയ്‌ക്കെതിരെ ആക്രമണം ആസൂത്രണം ചെയ്യുന്നില്ലെന്ന് പിന്നീട് വ്യക്തമാക്കി.