ലോക്സഭയും രാജ്യസഭയും പാസാക്കിയ ബില്ലുകളില് രാഷ്ട്രപതി ഒപ്പുവെച്ചതോടെ ഐ.പി.സി, സി.ആര്.പി.സി, ഇന്ത്യന് എവിഡൻസ് ആക്ട് എന്നിവയ്ക്കുപകരമായി അവതരിപ്പിക്കപ്പെട്ട ഭാരതീയ ന്യായ സംഹിത, ഭാരതീയ നാഗരിക് സുരക്ഷാ സംഹിത, ഭാരതീയ സാക്ഷ്യ ബില്ലും രാഷ്ട്രപതിയുടെ അംഗീകാരം ലഭിച്ചതോടെ നിയമമായി.
കൊളോണിയല് കാലഘട്ടത്തിലെ ക്രിമിനല് നിയമങ്ങള് ഭാരതീയമാക്കാനുദ്ദേശിച്ചാണ് പരിഷ്കരണമെന്നാണ് കേന്ദ്രത്തിന്റെ അവകാശവാദം.
1860-ലെ ഇന്ത്യന് ശിക്ഷാനിയമത്തിന് (ഐ.പി.സി.) പകരം ഭാരതീയ ന്യായ സംഹിത, 1898-ലെ ക്രിമിനല് നടപടിച്ചട്ടത്തിന് പകരം (സി.ആര്.പി.സി) ഭാരതീയ നാഗരിക് സുരക്ഷാ സംഹിത, 1872-ലെ ഇന്ത്യന് എവിഡൻസ് ആക്ടിന് പകരം ഭാരതീയ സാക്ഷ്യ എന്നീ ബില്ലുകളാണ് പാർലമെന്റിന്റെ ശൈത്യകാല സമ്മേളനത്തിൽ നേരത്തെ പാസാക്കിയിരുന്നത്.
ഓഗസ്റ്റ് 11-ന് കേന്ദ്ര ആഭ്യന്തരമന്ത്രി അമിത് ഷാ പാര്ലമെന്റില് അവതരിപ്പിച്ച ആദ്യ ബില്ലുകള് സ്റ്റാന്ഡിങ് കമ്മിറ്റിക്ക് വിട്ടിരുന്നു. കമ്മിറ്റി നവംബര് പത്തിന് റിപ്പോര്ട്ട് സമര്പ്പിച്ചതിന് പിന്നാലെ ഡിസംബര് 11-ന് ബില്ലുകള് പിന്വലിച്ചു. പിന്നീട് ശീതകാല സമ്മേളനത്തില് അവതരിപ്പിച്ച പുതിയ ബില്ലുകളാണ് സഭകള് പാസാക്കിയത്.
ആള്ക്കൂട്ട ആക്രമണങ്ങള് ക്രിമിനല് കുറ്റമാകുന്നതാണ് പുതിയ നിയമങ്ങള്. അന്വേഷണവും കുറ്റപത്രസമര്പ്പണവുമടക്കമുള്ള നടപടികള്ക്ക് സമയപരിധി നിശ്ചയിച്ചിട്ടുണ്ട്.
ഭരണകൂടത്തിന് എതിരായ പ്രവര്ത്തനങ്ങള് കുറ്റകരമാക്കുന്ന വകുപ്പ് ഒഴിവാക്കി. എന്നാല്, ഭാരതീയ ന്യാസംഹിതാ ബില്ലില് 150-ാം വകുപ്പ് രാജ്യദ്രോഹത്തെ കുറ്റകൃത്യമമായി നിലനിര്ത്തിയിട്ടുണ്ട്.
പുതിയ നിയമങ്ങള് പ്രകാരം രാജ്യത്തിന്റെ സാമ്പത്തിക സുരക്ഷയ്ക്കെതിരായ പ്രവർത്തനവും ഭീകരവാദമാകും. അതേസമയം, രാജ്യത്തിന്റെ രാഷ്ട്രീയ, സാമ്പത്തിക, സാമൂഹികഘടനയെ അസ്ഥിരപ്പെടുത്തുന്നത് ഭീകരപ്രവർത്തനമല്ല.
