അബ് കി ബാര്‍ ചാര്‍ സൗ പാര്‍ (ഇക്കുറി നാനൂറിനും മീതേ) എന്ന മുദ്രാവാക്യവുമായി ലോക്‌സഭാ തിരഞ്ഞെടുപ്പിനെ നേരിടാനിറങ്ങിയ എന്‍.ഡി.എ. 300 സീറ്റ് തികയ്ക്കാൻ വിയർക്കുന്നു. ബി.ജെ.പിയുടെയും എൻ.ഡി.എ സഖ്യത്തിന്‍റെയും ലക്ഷ്യം 400 എന്ന മാജിക് നമ്പർ തികക്കുക, ലോക്സഭയിൽ മൂന്നിൽ രണ്ട് ഭൂരിപക്ഷം ഉറപ്പാക്കുക, ബി.ജെ.പിക്ക് ഒറ്റക്ക് 370 സീറ്റ് നേടുക എന്നിങ്ങനെയായിരുന്നു. ‘ഒരു രാജ്യം, ഒരു തെരഞ്ഞെടുപ്പ്’ അടക്കം നിർണായക നീക്കങ്ങൾ കേന്ദ്ര ആഭ്യന്തര മന്ത്രി അമിത് ഷാ അടക്കമുള്ളവർ തെരഞ്ഞെടുപ്പിന് മുമ്പേ പ്രഖ്യാപിച്ചു. എന്നാൽ, എക്സിറ്റ് പോളുകളുടെ പ്രവചനങ്ങളെ പൊള്ളയാക്കി ‘ഇൻഡ്യ’ സഖ്യം അധികാരത്തിന് തൊട്ടടുത്തെന്ന രീതിയിൽ മികച്ച പ്രകടനം കാഴ്ചവെച്ചതോടെ മോദിയുടെയും ഷായുടെയും ഇത്തരം സ്വപ്നങ്ങളാണ് ഇല്ലാതാകുന്നത്.
ലോക്സഭയിൽ പ്രതിപക്ഷ നേതാവില്ലാത്ത പത്ത് വർഷമാണ് കടന്നുപോയത്. 2014ലെയും 2019ലെയും ലോക്സഭ തെരഞ്ഞെടുപ്പുകളിൽ കോൺഗ്രസിനുണ്ടായ വൻ തോൽവിയോടെ ലോക്സഭയിൽ പ്രതിപക്ഷ നേതൃ സ്ഥാനം ഇല്ലാതായിരുന്നു. എന്നാൽ, ഈ തെരഞ്ഞെടുപ്പിലെ തിരിച്ചുവരവിലൂടെ ലോക്സഭയിൽ ഔദ്യോഗികമായി തന്നെ പ്രതിപക്ഷ നേതൃ സ്ഥാനം ഉറപ്പിക്കുന്നു. കോൺഗ്രസിന് മാത്രം നൂറോളം സീറ്റുകളാണ് നിലവിലെ നിലക്ക് ലഭിക്കുക. കഴിഞ്ഞ തവണ ഇത് 52 മാത്രമായിരുന്നു. പ്രതിപക്ഷ നേതാവിന് 55 സീറ്റ് ആയിരുന്നു വേണ്ടിയിരുന്നത്. പ്രതിപക്ഷ നേതാവ് ഉണ്ടാകുന്നതോടെ സഭക്കുള്ളിൽ ശക്തമായ സാന്നിധ്യമാകാൻ സാധിക്കും. അതോടൊപ്പം ആരോടും ഒന്നിനോടും മറുപടി പറയേണ്ടതില്ലാത്ത രീതിയിൽ കഴിഞ്ഞ പത്ത് വർഷമായി ഭരണം നടത്തിയ എൻ.ഡി.എക്ക് മൂന്നാമൂഴത്തിൽ ശക്തമായ പ്രതിപക്ഷത്തെ അതിജീവിക്കേണ്ടി വരും.
മറ്റ് പ്രധാന വാർത്തകൾ:
- കേരളത്തിൽ യു.ഡി.ഫ് തരംഗം.
- തൃശൂർ എടുത്ത് സുരേഷ് ഗോപി.
- ഫോട്ടോ ഫിനിഷിലേക്ക് ആറ്റിങ്ങൽ.
- വടകരയില്‍ ഷാഫിപറമ്പില്‍ ജയമുറപ്പിച്ചു.
- ചാലക്കുടിയിൽ ബിജെപി നാലാമത്, മൂന്നാം സ്ഥാനത്ത് ട്വന്റി-ട്വന്റി.
- വയനാട്ടിൽ രാഹുൽ ഗാന്ധിയുടെയും എറണാകുളത്ത് ഹൈബി ഈഡന്റെയും ലീഡ് 2 ലക്ഷം കടന്നു.
- റായ്ബറേലിയിൽ രാഹുൽ ഗാന്ധിക്ക് 3 ലക്ഷത്തിലധികം ലീഡ്.
- വാരാണസിയിൽ മോദിയുടെ ലീഡ് ഒന്നര ലക്ഷത്തിൽ താഴെ.
- കോൺഗ്രസിന് സ്ഥാനാർഥിയില്ലാത്ത മധ്യപ്രദേശിലെ ഇൻഡോറിൽ നോട്ടയ്ക്ക് 2 ലക്ഷത്തിലധികം വോട്ട് ലഭിച്ചു.
- തിരുവനന്തപുരത്ത് ശശി തരൂരിന്റെ ലീഡ് 15,000 കടന്നു.
- സർക്കാർ രൂപീകരിക്കാൻ സാധ്യത തേടി ‘ഇന്ത്യ’, നായിഡുവിനെയും നിതീഷിനെയും ബന്ധപ്പെട്ടു
- ചന്ദ്രബാബു നായിഡുവിനോട് സംസാരിച്ച് മോഡി
- ഡിഎംകെ-ക്കായി വാതിലുകൾ തുറന്നിരിക്കുന്നുവെന്ന് ബിജെപി
