ലണ്ടൻ — മൂന്ന് വയസ്സ് പ്രായമുള്ള രണ്ട് ആൺകുട്ടികളെ ലൈംഗികമായി പീഡിപ്പിച്ച കേസിൽ യുകെയിൽ 18 വയസ്സുകാരനായ നഴ്സറി ജീവനക്കാരന് 10 വർഷം തടവ് ശിക്ഷ വിധിച്ച് കോടതി. തോമസ് വാലെറിൻ എന്ന പ്രതിയെയാണ് ശിക്ഷിച്ചത്.
വേനൽക്കാലത്താണ് തോമസ് ഈ നഴ്‌സറിയിൽ ജോലി ചെയ്തിരുന്നത്. കുട്ടികളെ ടോയ്‌ലറ്റിലേക്ക് കൊണ്ടുപോകുന്നതിനും വസ്ത്രം മാറാൻ സഹായിക്കുന്നതിനും ചുമതലയുള്ള ജീവനക്കാരനായിരുന്നു ഇയാൾ. 2024 ജൂലൈയ്ക്കും ഓഗസ്‌റ്റിനുമിടയിൽ സറേയിലെ, നിയമപരമായ കാരണങ്ങളാൽ പേര് വെളിപ്പെടുത്താത്ത ഒരു നഴ്സറിയിലാണ് കുറ്റകൃത്യങ്ങൾ നടന്നത്.
കുട്ടികളും മാതാപിതാക്കളും കടന്നുപോകുന്നത് “ഹൃദയഭേദകമായ” സാഹചര്യത്തിലൂടെയാണെന്ന് വിധി പറഞ്ഞ ജഡ്‌ജി ക്ലെയർ ഹാർഡൻ-ഫ്രോസ്‌റ്റ് അഭിപ്രായപ്പെട്ടു. ഈ വർഷം ആദ്യം സ്‌റ്റെയിൻസ് യൂത്ത് കോടതിയിൽ നടന്ന വിചാരണയിൽ തോമസ് കുട്ടികളെ ലൈംഗികമായി പീഡിപ്പിച്ചതായി തെളിഞ്ഞിരുന്നു. കൂടാതെ, പ്രതി കുട്ടികളുടെ അശ്ലീല ചിത്രങ്ങളും പകർത്തി എന്നും കോടതി കണ്ടെത്തി. വെളുത്ത പോളോ ഷർട്ടും കറുത്ത കോട്ടും ധരിച്ച് കോടതിയിലെത്തിയ തോമസ്, ശിക്ഷാവിധി കേട്ടപ്പോൾ ഭാവവ്യത്യാസങ്ങളൊന്നും പ്രകടിപ്പിച്ചില്ല.