വിപണി വൈവിധ്യവൽക്കരണം ലക്ഷ്യം വെച്ച് അയർലൻഡ് യുഎസ് താരിഫുകളെ നേരിടാൻ പുതിയ പദ്ധതികൾ പ്രഖ്യാപിച്ചു

ഡബ്ലിൻ – അമേരിക്കൻ തീരുവകൾ നേരിടുന്ന അയർലൻഡിലെ ബിസിനസുകളെ പിന്തുണയ്ക്കുന്നതിനായി സർക്കാർ ഇന്ന് പുതിയ പദ്ധതികൾ പ്രഖ്യാപിക്കും. യു.എസ്.സിലേക്ക് യൂറോപ്യൻ യൂണിയൻ നടത്തുന്ന കയറ്റുമതിക്ക് 15% താരിഫ് ഏർപ്പെടുത്തിയ സാഹചര്യത്തിലാണ് ‘വിപണി വൈവിധ്യവൽക്കരണത്തിനായുള്ള കർമ്മപദ്ധതി’ (Action Plan on Market Diversification) എന്ന പേരിൽ പുതിയ തന്ത്രം സർക്കാർ അവതരിപ്പിക്കുന്നത്.

തുടർന്ന് വായിക്കുക:

ടാനിസ്റ്റെയും വിദേശകാര്യ, വ്യാപാര മന്ത്രിയുമായ സൈമൺ ഹാരിസും, വ്യവസായ, ടൂറിസം, തൊഴിൽ മന്ത്രി പീറ്റർ ബർക്കും ചേർന്ന് പുറത്തിറക്കുന്ന ഈ പദ്ധതിയിൽ നൂറിലധികം പ്രവർത്തനങ്ങൾ ഉൾക്കൊള്ളിച്ചിട്ടുണ്ട്. നിലവിലെ വെല്ലുവിളികളെ ലഘൂകരിക്കാനും സാമ്പത്തിക ഭദ്രത ഉറപ്പാക്കാനും ഇത് സഹായിക്കുമെന്ന് സർക്കാർ പറയുന്നു.

പദ്ധതിയിലെ പ്രധാന നിർദ്ദേശങ്ങൾ ഇവയാണ്:

• കയറ്റുമതിക്ക് പിന്തുണ: ലോകമെമ്പാടുമുള്ള വിപണികളിലേക്ക് പ്രവേശിക്കാൻ 170 പുതിയ ഐറിഷ് കയറ്റുമതിക്കാർക്ക് പിന്തുണ നൽകുന്ന ഒരു പരിപാടിക്ക് തുടക്കം കുറിക്കും.
• വിദഗ്ധ തൊഴിലാളികൾക്ക് വിസ: ഉയർന്ന ആവശ്യകതയുള്ള മേഖലകളിലേക്ക് വിദഗ്ധ തൊഴിലാളികളെ വേഗത്തിൽ എത്തിക്കുന്നതിനായി അതിവേഗ വിസ ഓപ്ഷനുകളുടെ സാധ്യത സർക്കാർ പരിശോധിക്കും.
• പുതിയ വ്യോമപാതകൾ: പുതിയ എയർ ആക്സസ് ഫണ്ട് സ്ഥാപിച്ച്, തന്ത്രപ്രധാനമായ ദീർഘദൂര ലക്ഷ്യസ്ഥാനങ്ങൾ ഉൾപ്പെടെ പുതിയ വ്യോമപാതകൾ കണ്ടെത്തും.
• സർക്കാർ ഏജൻസികളുടെ വിപുലീകരണം: വിദേശ രാജ്യങ്ങളിലുള്ള ഐറിഷ് ഏജൻസികളുടെ പ്രവർത്തനങ്ങൾ വിപുലീകരിക്കും. 20-ലധികം സ്ഥലങ്ങളിൽ സാന്നിധ്യമുള്ള ഐഡിഎ (ഇൻഡസ്ട്രിയൽ ഡെവലപ്‌മെന്റ് അതോറിറ്റി) ദക്ഷിണ കൊറിയൻ തലസ്ഥാനമായ സോളിൽ പുതിയ ഓഫീസ് സ്ഥാപിക്കും. ബോർഡ് ബിയ മൂന്ന് വിപണികളിൽ തങ്ങളുടെ സാന്നിധ്യം വർദ്ധിപ്പിക്കാൻ ശ്രമിക്കും, ടൂറിസം അയർലൻഡ് അമേരിക്കയിലും കാനഡയിലും കൂടുതൽ ടീമുകളെ നിയോഗിക്കും.
• ‘അയർലൻഡ് ഹൗസ്’ മോഡൽ: നയതന്ത്രജ്ഞരും മറ്റ് സർക്കാർ ഏജൻസികളും ഒരൊറ്റ കുടക്കീഴിൽ പ്രവർത്തിക്കുന്ന ‘അയർലൻഡ് ഹൗസ്’ മോഡൽ വിപുലീകരിക്കും. ന്യൂയോർക്ക്, ടോക്കിയോ, സിംഗപ്പൂർ, ഷാങ്ഹായ്, ചിക്കാഗോ എന്നിവിടങ്ങളിൽ നിലവിലുള്ള ഈ സൗകര്യം ലണ്ടൻ, ടൊറന്റോ, ലിയോൺ, മിലാൻ, മാഡ്രിഡ് എന്നിവിടങ്ങളിലേക്കും വ്യാപിപ്പിക്കാൻ പദ്ധതിയുണ്ട്.
• വ്യാപാര ദൗത്യങ്ങൾ: 2025-ൽ കാനഡയിലേക്കുള്ള മൾട്ടി-മിനിസ്റ്റീരിയൽ സന്ദർശനത്തോടെ ടാവോസീച്ച് (Taoiseach) നേതൃത്വം നൽകുന്ന വ്യാപാര ദൗത്യങ്ങൾ പുനരാരംഭിക്കും. 2026, 2027 വർഷങ്ങളിലും സമാനമായ ദൗത്യങ്ങൾ ആസൂത്രണം ചെയ്യും.
• സെന്റ് പാട്രിക്സ് ഡേ പരിപാടി: സെന്റ് പാട്രിക്സ് ദിനത്തോടനുബന്ധിച്ചുള്ള സർക്കാർ പരിപാടികൾക്ക് പ്രധാനപ്പെട്ടതും ഉയർന്നുവരുന്നതുമായ വിപണികളിൽ കൂടുതൽ ശ്രദ്ധ നൽകും.