ലിമറിക്ക്: ലിമറിക്ക് കൗണ്ടിയിലെ മോയ്റോസിൽ പുതിയ ട്രെയിൻ സ്റ്റേഷൻ നിർമ്മിക്കുന്നതിന് ഐയേൺറോഡ് എറെൻ (Iarnród Éireann) പ്ലാനിങ് അപേക്ഷ സമർപ്പിച്ചു. ലിമറിക്ക്-ഗാൽവേ റെയിൽവേ ലൈനിലാണ് പുതിയ സ്റ്റേഷൻ വരുന്നത്. മോയ്റോസിലെ വർധിച്ചുവരുന്ന ജനസംഖ്യയ്ക്ക് പ്രയോജനകരമാകുന്ന തരത്തിലാണ് പുതിയ സ്റ്റേഷൻ രൂപകൽപ്പന ചെയ്തിരിക്കുന്നത്.
അനുമതി ലഭിക്കുകയും ഫണ്ട് അനുവദിക്കുകയും ചെയ്താൽ 2026-ൽ നിർമ്മാണം ആരംഭിക്കുമെന്നാണ് പ്രതീക്ഷിക്കുന്നത്. 15 മാസത്തിനുള്ളിൽ നിർമ്മാണം പൂർത്തിയാക്കാനാണ് ലക്ഷ്യമിടുന്നത്. കോർപ്പസ് ക്രിസ്റ്റി പ്രൈമറി സ്കൂളിനും മോയ്റോസ് കമ്മ്യൂണിറ്റി എന്റർപ്രൈസ് സെന്ററിനും പിന്നിലായാണ് സ്റ്റേഷൻ നിർമ്മിക്കാൻ ഉദ്ദേശിക്കുന്നത്. കൂടാതെ, കോർപ്പസ് ക്രിസ്റ്റി പാരിഷ് ചർച്ചിനും മില്ലേനിയം പാർക്ക് വഴിയുള്ള മോയ്റോസ് അവന്യൂവിനും സമീപത്ത് നിന്ന് സ്റ്റേഷനിലേക്ക് പ്രവേശനമുണ്ടാകും.
ദേശീയ ഗതാഗത അതോറിറ്റി വഴി ഗതാഗത വകുപ്പാണ് പദ്ധതിക്ക് ഫണ്ട് നൽകുന്നത്. രാജ്യത്തുടനീളം സുസ്ഥിര യാത്രാ സൗകര്യങ്ങൾ ഒരുക്കുന്നതിനുള്ള ഗതാഗത വകുപ്പിന്റെ പാത്ത്ഫൈൻഡർ പ്രോഗ്രാമിന്റെ ഭാഗമാണിത്.
പുതിയ സ്റ്റേഷൻ മറ്റ് പ്രാദേശിക ഗതാഗത ശൃംഖലകളുമായി സംയോജിപ്പിക്കും. ലിമറിക്ക് സിറ്റി ആൻഡ് കൗണ്ടി കൗൺസിലിന്റെ യൂണിവേഴ്സിറ്റി അവന്യൂ പദ്ധതി, എൻടിഎയുടെ ബസ് കണക്ട്സ് ലിമറിക്ക്, നിർദിഷ്ട ലിമറിക്ക് സൈക്കിൾ കണക്ട്സ് നെറ്റ്വർക്ക് എന്നിവയുമായി സ്റ്റേഷൻ സംയോജിപ്പിക്കും.
ഈ റെയിൽ പദ്ധതിക്ക് പൂർണ്ണ പിന്തുണ നൽകുമെന്ന് ഗതാഗത മന്ത്രി ഡാറ ഓ’ബ്രയൻ പറഞ്ഞു. മോയ്റോസിന്റെ പുനരുജ്ജീവനത്തെ പിന്തുണയ്ക്കുന്ന തരത്തിൽ ഈ മേഖലയിലേക്ക് ഒരു പ്രധാന പൊതുഗതാഗത സൗകര്യം നൽകാൻ പുതിയ സ്റ്റേഷൻ ലക്ഷ്യമിടുന്നതായും അദ്ദേഹം കൂട്ടിച്ചേർത്തു.
