ഇനി ജർമ്മനി വഴി വിസയില്ലാതെ പറക്കാം; ഇന്ത്യൻ പൗരന്മാർക്ക് ട്രാൻസിറ്റ് വിസ ഒഴിവാക്കി ജർമ്മൻ ഗവൺമെന്റ്

അന്താരാഷ്ട്ര യാത്രക്കാരായ ഇന്ത്യൻ പൗരന്മാർക്ക് വലിയ ആശ്വാസം നൽകിക്കൊണ്ട്, ജർമ്മനിയിലെ വിമാനത്താവളങ്ങൾ വഴിയുള്ള ലേഓവറുകൾക്ക് (Layover) ഉണ്ടായിരുന്ന എയർപോർട്ട് ട്രാൻസിറ്റ് വിസ നിബന്ധന ജർമ്മൻ ഗവൺമെന്റ് പൂർണ്ണമായും ഒഴിവാക്കി. ജർമ്മനിയിലെ പ്രമുഖ വിമാനത്താവളങ്ങൾ വഴി മറ്റ് മൂന്നാമതൊരു രാജ്യത്തേക്ക് യാത്ര ചെയ്യുന്ന ഇന്ത്യൻ പാസ്‌പോർട്ട് ഉടമകൾക്ക് ഏറെ പ്രയോജനപ്പെടുന്ന ഈ പുതിയ നിയമം ഇന്നു മുതൽ (ജൂൺ 3) പ്രാബല്യത്തിൽ വന്നു. ഇനി മുതൽ ജർമ്മൻ വിമാനത്താവളങ്ങളിൽ വിമാനം മാറിക്കയറാൻ മാത്രമായി പ്രത്യേകം വിസ അപേക്ഷ നൽകേണ്ടതില്ല.

ന്യൂഡൽഹിയിലെ ജർമ്മൻ എംബസി വ്യക്തമാക്കിയതനുസരിച്ച്, ഈ വിസ ഇളവ് സംബന്ധിച്ച ഔദ്യോഗിക പ്രഖ്യാപനം ജൂൺ 2-ന് ജർമ്മനിയുടെ ഫെഡറൽ ലോ ഗസറ്റിൽ (Bundesgesetzblatt) പ്രസിദ്ധീകരിച്ചിരുന്നു. ജർമ്മൻ ചാൻസലർ ഫ്രീഡ്രിക്ക് മെർസ് ഈ വർഷം ജനുവരിയിൽ ഇന്ത്യ സന്ദർശിച്ചപ്പോൾ ഇരുരാജ്യങ്ങളും തമ്മിൽ നടത്തിയ ഉഭയകക്ഷി ചർച്ചകളുടെയും ധാരണകളുടെയും തുടർച്ചയായാണ് ഈ ചരിത്രപരമായ തീരുമാനം നടപ്പിലാക്കിയിരിക്കുന്നത്. ഇന്ത്യയും ജർമ്മനിയും തമ്മിലുള്ള സാമ്പത്തിക-വ്യാപാര ബന്ധങ്ങൾ ശക്തമാക്കുന്നതിനും ജനങ്ങൾ തമ്മിലുള്ള സമ്പർക്കം വർദ്ധിപ്പിക്കുന്നതിനുമാണ് ഈ നടപടിയെന്ന് എംബസി പ്രസ്താവനയിൽ അറിയിച്ചു.

മുൻപുണ്ടായിരുന്ന കർശനമായ നിയമപ്രകാരം, ഇന്ത്യൻ പാസ്‌പോർട്ട് ഉള്ളവർക്ക് അമേരിക്ക, കാനഡ അല്ലെങ്കിൽ ഏതെങ്കിലും ഷെങ്കൻ (Schengen) രാജ്യങ്ങളിലെ സാധുവായ വിസയോ റെസിഡൻസ് പെർമിറ്റോ ഇല്ലെങ്കിൽ, ജർമ്മനി വഴി ട്രാൻസിറ്റ് ചെയ്യുന്നതിന് ‘ടൈപ്പ്-എ’ (Type A) എയർപോർട്ട് ട്രാൻസിറ്റ് വിസ നിർബന്ധമായിരുന്നു. വെറും കുറച്ചു മണിക്കൂറുകൾ വിമാനത്താവളത്തിനുള്ളിൽ കാത്തിരിക്കുന്നതിന് വേണ്ടി മാത്രം യാത്രികർ 90 യൂറോയോളം (ഏതാണ്ട് 8,000 രൂപയിലധികം) വിസ ഫീസായി നൽകുകയും, വിഎഫ്എസ് (VFS) വഴി ബയോമെട്രിക്സ് നൽകി രണ്ടാഴ്ചയോളം കാത്തിരിക്കുകയും ചെയ്യേണ്ടി വന്നിരുന്നു.

പുതിയ നിയമം വന്നതോടെ ഈ വലിയ സാമ്പത്തിക ബാധ്യതയും നൂലാമാലകളും പൂർണ്ണമായും ഇല്ലാതായി. യൂറോപ്പിലെ തന്നെ ഏറ്റവും വലിയ വ്യോമയാന ഹബുകളായ ഫ്രാങ്ക്ഫർട്ട്, മ്യൂണിക്ക് എന്നിവയ്ക്ക് പുറമെ ബെർലിൻ ബ്രാൻഡൻബർഗ്, ഡ്യൂസൽഡോർഫ്, ഹാംബർഗ് എന്നീ അഞ്ച് പ്രമുഖ ജർമ്മൻ വിമാനത്താവളങ്ങൾ വഴിയും ഇന്ത്യൻ യാത്രികർക്ക് ഇനി സുഗമമായി കണക്റ്റിംഗ് ഫ്ലൈറ്റുകൾ ബുക്ക് ചെയ്യാം. ഇത് വടക്കേ അമേരിക്ക (യു.എസ്.എ, കാനഡ), ലാറ്റിൻ അമേരിക്ക, ആഫ്രിക്ക, മറ്റ് നോൺ-ഷെങ്കൻ യൂറോപ്യൻ രാജ്യങ്ങൾ എന്നിവടങ്ങളിലേക്കുള്ള യാത്ര സുഗമമാക്കും.

ഈ വിസ ഇളവ് വിമാനത്താവളത്തിന് പുറത്തേക്ക് ഇറങ്ങാനുള്ള അനുമതിയല്ലെന്ന് ഇമിഗ്രേഷൻ അധികൃതർ പ്രത്യേകം ഓർമ്മിപ്പിക്കുന്നു. ഇത് ‘എയർസൈഡ് ട്രാൻസിറ്റ്’ (Airside Transit) നിയമങ്ങൾക്ക് മാത്രം ബാധകമായ ഒന്നാണ്. അതായത്, യാത്രക്കാർ വിമാനത്താവളത്തിലെ അന്താരാഷ്ട്ര ട്രാൻസിറ്റ് സോണിന് (International Transit Zone) ഉള്ളിൽ തന്നെ തുടരേണ്ടതുണ്ട്.

യാത്രക്കാർക്ക് കൃത്യമായ യാത്രാ രേഖകളും, ജർമ്മനിയിൽ നിന്ന് പോകുന്ന അടുത്ത വിമാനത്തിന്റെ കൺഫേം ചെയ്ത ടിക്കറ്റും, പോകുന്ന രാജ്യത്തെ സാധുവായ വിസയും ഉണ്ടായിരിക്കണം. കൂടാതെ, വിമാനത്താവളത്തിലെ ലേഓവർ സമയം 24 മണിക്കൂറിൽ കൂടാൻ പാടില്ല. യാത്രാവേളയിൽ ഒരു കാരണവശാലും വിമാനത്താവളത്തിലെ ഇമിഗ്രേഷൻ കൗണ്ടർ കടന്ന് പുറത്തുപോകാനോ, ലഗേജ് ക്ലെയിം ചെയ്യാനോ അനുവാദമില്ല.

വ്യത്യസ്ത എയർലൈനുകളിൽ വെവ്വേറെ ടിക്കറ്റുകൾ ബുക്ക് ചെയ്യുന്നവർ (Self-transfer) ജർമ്മനിയിൽ ഇറങ്ങി ലഗേജ് എടുത്ത് വീണ്ടും ചെക്ക്-ഇൻ ചെയ്യേണ്ടി വരുമെന്നതിനാൽ, അവർക്ക് ട്രാൻസിറ്റ് വിസ ഇളവ് ലഭിക്കില്ല. അങ്ങനെയുള്ളവർക്ക് സാധാരണ ഷെങ്കൻ വിസ തന്നെ വേണ്ടി വരും. കൂടാതെ, വിമാനം വൈകുന്നത് മൂലം വിമാനത്താവളത്തിന് പുറത്തുള്ള ഹോട്ടലുകളിൽ തങ്ങേണ്ടി വന്നാലും ഇമിഗ്രേഷൻ അനുമതി ആവശ്യമാണ്.

ഈ വർഷം ഇന്ത്യൻ പൗരന്മാർക്ക് ട്രാൻസിറ്റ് വിസ ഇളവ് നൽകുന്ന രണ്ടാമത്തെ പ്രമുഖ യൂറോപ്യൻ രാജ്യമാണ് ജർമ്മനി. നേരത്തെ, ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ ഇന്ത്യ സന്ദർശനത്തിന് ശേഷം കഴിഞ്ഞ ഏപ്രിൽ 10 മുതൽ ഫ്രാൻസും ഇന്ത്യൻ പാസ്‌പോർട്ട് ഉള്ളവർക്ക് എയർപോർറ്റ് ട്രാൻസിറ്റ് വിസ ഒഴിവാക്കിയിരുന്നു. ഗൾഫ് രാജ്യങ്ങൾക്കും യുകെയ്ക്കും പുറമെ ഇപ്പോൾ ഫ്രാൻസും ജർമ്മനിയും കൂടി വിസ ഇളവുകൾ പ്രഖ്യാപിച്ചതോടെ, വരും ദിവസങ്ങളിൽ അന്താരാഷ്ട്ര വിമാന ടിക്കറ്റ് നിരക്കുകളിൽ വലിയ കുറവുണ്ടാകുമെന്നാണ് ട്രാവൽ ഏജൻസികൾ വിലയിരുത്തുന്നത്.