ഡബ്ലിൻ – രാജ്യതലസ്ഥാനത്ത് മയക്കുമരുന്ന് വേട്ടയുമായി ബന്ധപ്പെട്ട് അയർലൻഡിലെ ദേശീയ പോലീസ് സേനയായ ഗാർഡാ സിഓചാന (Garda Síochána) വൻ മുന്നേറ്റം. ഡബ്ലിനിൽ നടത്തിയ റെയ്ഡിൽ 1.2 മില്യൺ യൂറോ (ഏകദേശം 1.07 കോടി ഇന്ത്യൻ രൂപ) വിലമതിക്കുന്ന കൊക്കെയ്ൻ പിടികൂടി. സംഭവവുമായി ബന്ധപ്പെട്ട് രണ്ട് പേരെ അറസ്റ്റ് ചെയ്ത് കേസ് ചാർജ് ചെയ്തു. മയക്കുമരുന്ന് വിൽപ്പനയും വിതരണവും ലക്ഷ്യമിട്ടുള്ള ഓപ്പറേഷൻ താരയുടെ ഭാഗമായി ബുധനാഴ്ച, സെപ്റ്റംബർ 17, 2025-നാണ് ഈ മിന്നൽ പരിശോധന നടന്നത്.
ഫിംഗ്ലാസ് ഡ്രഗ്സ് യൂണിറ്റ്, ഡബ്ലിൻ ക്രൈം റെസ്പോൺസ് ടീം, ഡി.എം.ആർ. വെസ്റ്റ് ഡിവിഷനിലെയും റീജിയണൽ ആർമ്ഡ് സപ്പോർട്ട് യൂണിറ്റിലെയും ഉദ്യോഗസ്ഥർ എന്നിവർ സംയുക്തമായി നടത്തിയ നീക്കത്തിലാണ് പ്രതികൾ വലയിലായത്. രണ്ട് വ്യത്യസ്ത സ്ഥലങ്ങളിൽ വാറന്റോടെ നടത്തിയ പരിശോധനയിലാണ് മയക്കുമരുന്ന് ശേഖരം കണ്ടെത്തിയത്.
ഡബ്ലിൻ 11-ലെ ഒരു വീട്ടിൽ നിന്ന് 12 കിലോഗ്രാം കൊക്കെയ്ൻ ആണ് ആദ്യം പിടികൂടിയത്. ഇതിന് 8.4 ലക്ഷം യൂറോ (ഏകദേശം 75 ലക്ഷം ഇന്ത്യൻ രൂപ) വിപണി മൂല്യം കണക്കാക്കുന്നു. തുടർന്ന് നടത്തിയ പരിശോധനയിൽ ഡബ്ലിൻ 15-ലെ മറ്റൊരു വീട്ടിൽ നിന്ന് 5.5 കിലോഗ്രാം കൊക്കെയ്ൻ കൂടി പിടിച്ചെടുത്തു. ഇതിന് 3.75 ലക്ഷം യൂറോ (ഏകദേശം 33 ലക്ഷം ഇന്ത്യൻ രൂപ) വിലവരും.
രണ്ട് സ്ഥലത്തുനിന്നുമായി അറസ്റ്റ് ചെയ്ത പ്രതികളെ, അതായത് 30 വയസ്സും 40 വയസ്സും പ്രായമുള്ളവരെ, ക്രിമിനൽ ജസ്റ്റിസ് (മയക്കുമരുന്ന് കടത്ത്) നിയമം, 1996, സെക്ഷൻ 2 പ്രകാരം തടങ്കലിലാക്കി. ഇരുവർക്കുമെതിരെയും കുറ്റം ചുമത്തിയിട്ടുണ്ട്. ഇന്ന്, സെപ്റ്റംബർ 18, വ്യാഴാഴ്ച രാവിലെ 10.30-ന് ബ്ലാൻച്ചാർഡ്‌സ്‌ടൗൺ ഡിസ്ട്രിക്റ്റ് കോടതിയിൽ (കോർട്ട് നമ്പർ 1) ഇവരെ ഹാജരാക്കും.
പിടിച്ചെടുത്ത കൊക്കെയ്ൻ കൂടുതൽ ശാസ്ത്രീയ പരിശോധനകൾക്കായി ഫോറൻസിക് സയൻസ് അയർലൻഡിന് കൈമാറിയിട്ടുണ്ടെന്ന് അധികൃതർ അറിയിച്ചു. കേസിൽ കൂടുതൽ അന്വേഷണങ്ങൾ പുരോഗമിക്കുകയാണെന്നും ഗാർഡാ സിഓചാന വ്യക്തമാക്കി. തലസ്ഥാനത്തെ ലഹരിമാഫിയകൾക്ക് ലഭിച്ച കനത്ത തിരിച്ചടിയായാണ് ഈ മയക്കുമരുന്ന് വേട്ടയെ വിലയിരുത്തുന്നത്.
