അയർലൻഡിൽ എട്ടുവയസ്സിൽ താഴെയുള്ള കുട്ടികൾക്ക് ഇനി മുതൽ പൊതുഗതാഗത സംവിധാനങ്ങളിൽ സൗജന്യമായി യാത്ര ചെയ്യാം. പുതിയ ചൈൽഡ് 5-8 ടിഎഫ്ഐ ലീപ് കാർഡ് (Child 5-8 TFI Leap Card) പദ്ധതിക്ക് ഈ ബുധനാഴ്ച തുടക്കമാകും. ഇതിലൂടെ രാജ്യത്തെ രണ്ടര ലക്ഷത്തിലധികം കുട്ടികൾക്ക് സൗജന്യ യാത്രാസൗകര്യം ലഭ്യമാകും. പൊതുഗതാഗതം കൂടുതൽ കുടുംബ സൗഹൃദവും താങ്ങാനാവുന്നതുമാക്കുക എന്ന സർക്കാർ ലക്ഷ്യത്തിന്റെ ഭാഗമാണിത്.
പദ്ധതിയുടെ വിശദാംശങ്ങൾ
പുതിയ ലീപ് കാർഡ് ഉപയോഗിച്ച് ഡബ്ലിൻ ബസ്, ബസ് ഐറൻ, ഗോ-അഹെഡ് ഐർലൻഡ്, ഐറിഷ് റെയിൽ, ലുവാസ് തുടങ്ങി എല്ലാ ട്രാൻസ്പോർട്ട് ഫോർ ഐർലൻഡ് (TFI) സേവനങ്ങളിലും സൗജന്യമായി യാത്ര ചെയ്യാം. ഒരു കുട്ടിയുടെ ഒമ്പതാം ജന്മദിനം വരെ ഈ കാർഡ് ഉപയോഗിക്കാനാകും. അഞ്ചു വയസ്സിൽ താഴെയുള്ള കുട്ടികൾക്ക് നിലവിൽ കാർഡ് ഇല്ലാതെ തന്നെ സൗജന്യ യാത്ര അനുവദനീയമാണ്.
രക്ഷിതാക്കൾക്ക് ലീപ് കാർഡ് ഓൺലൈൻ പോർട്ടൽ വഴി പുതിയ കാർഡിനായി അപേക്ഷിക്കാം. അപേക്ഷിക്കുന്നതിനായി രക്ഷിതാക്കളുടെയും കുട്ടിയുടെയും പാസ്‌പോർട്ട്, ഡ്രൈവിംഗ് ലൈസൻസ്, ജനന സർട്ടിഫിക്കറ്റ് തുടങ്ങിയ തിരിച്ചറിയൽ രേഖകൾ അപ്‌ലോഡ് ചെയ്യേണ്ടതുണ്ട്.
കുട്ടികളുടെ യാത്രാ ടിക്കറ്റ് നിരക്കിൽ ഇളവ് ലഭിക്കുന്ന നിലവിലെ ചൈൽഡ് (5-15) ലീപ് കാർഡ് കൈവശമുള്ള അഞ്ചു മുതൽ എട്ടു വയസ്സു വരെയുള്ള കുട്ടികൾക്കും ഈ സൗജന്യ യാത്രാ പദ്ധതിയുടെ ആനുകൂല്യം ലഭിക്കുന്നതിനായി പുതിയ കാർഡിന് അപേക്ഷിക്കേണ്ടതാണ്. സാധാരണ യാത്രാ കാർഡുകൾ പോലെ തന്നെ ഈ കാർഡും യാത്രയുടെ തുടക്കത്തിലും അവസാനത്തിലും ടാപ്പ് ചെയ്യേണ്ടതുണ്ട്.
