ഡബ്ലിൻ കലാപത്തിനിടെ ഗാർഡയെ ആക്രമിച്ച കേസിൽ പ്രതിക്ക് അഞ്ചര വർഷം തടവ്

ഡബ്ലിൻ – 2023 നവംബർ 23-ന് ഡബ്ലിനിൽ നടന്ന കലാപത്തിനിടെ ഒരു ഗാർഡ സർജന്റിനെ വളഞ്ഞാക്രമിച്ച കേസിൽ പ്രതിയായ യുവാവിന് അഞ്ചര വർഷം തടവ് ശിക്ഷ വിധിച്ചു.

ഡബ്ലിനിലെ കിൻലേ ഹൗസ് ഹോസ്റ്റലിൽ താമസിക്കുന്ന തോമസ് ഫോക്സ് (22) ആണ് ശിക്ഷിക്കപ്പെട്ടത്. ഗാർഡ സർജന്റിനെ ആക്രമിച്ചതുൾപ്പെടെ ആറ് കുറ്റകൃത്യങ്ങളിൽ ഇയാൾ കുറ്റസമ്മതം നടത്തി. ഇതിൽ ഉൾപ്പെടുന്ന പ്രധാന കുറ്റങ്ങൾ ഇവയാണ്:

• അക്രമാസക്തമായ അതിക്രമം (Violent Disorder) – ഗാർഡ സർജന്റിനെ ആക്രമിച്ചത്.
• കവർച്ച – ഫൂട്ട്‌ലോക്കർ സ്‌പോർട്‌സ് ഷോപ്പിൽ നിന്ന് മോഷണം നടത്തിയത്.
• ക്രിമിനൽ കേടുപാടുകൾ – ഓ’കോണൽ പാലത്തിൽ തീയിട്ട ബസിന് നാശനഷ്ടമുണ്ടാക്കിയത്.
• നിയമവിരുദ്ധമായി കമ്പ്യൂട്ടർ ഉപയോഗിക്കൽ (ആക്രമണം ലൈവ് സ്ട്രീം ചെയ്തതുമായി ബന്ധപ്പെട്ട്).
• മയക്കുമരുന്ന് കൈവശം വെക്കൽ (അറസ്റ്റ് ചെയ്യുമ്പോൾ €210 വിലവരുന്ന കഞ്ചാവും €340 വിലവരുന്ന ക്രാക്ക് കൊക്കെയ്‌നും കണ്ടെത്തി).

പോലീസുകാരന് നേരെയുള്ള ആക്രമണവും പ്രത്യാഘാതങ്ങളും

ബർഗ് ക്വേയിൽ വെച്ച് സർജന്റ് ബ്രെൻഡൻ എഡ്ഡറിയെ ഒറ്റപ്പെടുത്തി, വളഞ്ഞ്, ആൾക്കൂട്ടം ആക്രമിച്ചത് കലാപത്തിലെ ഏറ്റവും ഭീകരമായ നിമിഷങ്ങളിൽ ഒന്നായിരുന്നു. താൻ തെന്നി വീണിരുന്നെങ്കിൽ നിലത്ത് വെച്ച് ആക്രമിക്കപ്പെടുമായിരുന്നു എന്ന് സർജന്റ് എഡ്ഡറി കോടതിയിൽ മൊഴി നൽകി.

സഹായിക്കാനായി ഓടിയെത്തിയ സഹപ്രവർത്തകൻ ഗാർഡ മാർക്ക് ഡഫിയെയും ആക്രമിച്ചു. ഡഫിയുടെ സൈക്കിൾ ലിഫി നദിയിലേക്ക് വലിച്ചെറിയുകയും ചെയ്തു. ഡഫിയുടെ സഹായമില്ലായിരുന്നെങ്കിൽ താൻ രക്ഷപ്പെടില്ലായിരുന്നു എന്ന് എഡ്ഡറി സർജന്റ് കോടതിയിൽ പറഞ്ഞു. ആക്രമണത്തിന്റെ വൈകാരികമായ പ്രത്യാഘാതങ്ങൾ ഗുരുതരമായിരുന്നു; ആക്രമണം തത്സമയം സംപ്രേക്ഷണം ചെയ്യപ്പെട്ടത് കാരണം എഡ്ഡറി സർജന്റിന്റെ ഭാര്യക്ക് ആസ്ത്മ വരികയും മകൾ താൻ കൊല്ലപ്പെട്ടു എന്ന് ഭയപ്പെടുകയും ചെയ്തു.

ഫോക്സ് ഏകദേശം നാല് മണിക്കൂറോളം കലാപത്തിൽ പങ്കെടുത്തതായി ഡിറ്റക്റ്റീവ് ഇൻസ്‌പെക്ടർ കെൻ ഹോയർ സ്ഥിരീകരിച്ചു. ഫോക്‌സ് ആദ്യം കുറ്റം നിഷേധിച്ചെങ്കിലും പിന്നീട് കുറ്റസമ്മതം നടത്തി.

ഇന്ന് കേസ് പരിഗണിച്ച ജഡ്ജി മാർട്ടിൻ നോലൻ ആക്രമണസമയത്ത് എഡ്ഡറി സർജന്റ് കാണിച്ച ധീരമായ പെരുമാറ്റത്തെ പ്രശംസിക്കുകയും അദ്ദേഹത്തിന് ഭാവിയിൽ എല്ലാ ആശംസകളും നേരുകയും ചെയ്തു.