ഡബ്ലിൻ, അയർലൻഡ് — ഡബ്ലിൻ നഗരത്തിൽ വർധിച്ചു വരുന്ന അക്രമങ്ങൾക്കും സാമൂഹ്യ വിരുദ്ധ പ്രവർത്തനങ്ങൾക്കും അറുതി വരുത്തുന്നതിനായി കർഫ്യൂവും പ്രവേശന വിലക്ക് മേഖലകളും (exclusion zones) ഏർപ്പെടുത്തണമെന്ന് ഡബ്ലിൻ ടൗൺ സി.ഇ.ഒ. റിച്ചാർഡ് ഗിനി ആവശ്യപ്പെട്ടു. കഴിഞ്ഞ വാരാന്ത്യത്തിൽ 17 വയസ്സുള്ള ഒരു വിദ്യാർത്ഥിക്ക് നഗരമധ്യത്തിൽ കുത്തേറ്റതിനെ തുടർന്ന് ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ച സംഭവം അടക്കം അടുത്തിടെയുണ്ടായ അക്രമങ്ങളിൽ ഗാർഡൈ (അയർലൻഡ് പോലീസ്) അന്വേഷണം നടത്തിവരികയാണ്. ഇതിന് തലേദിവസം ടെമ്പിൾ ബാർ എന്ന സ്ഥലത്ത് വെച്ച് വാക്കുതർക്കത്തെ തുടർന്ന് ഒരു ഇംഗ്ലീഷ് വിനോദസഞ്ചാരിയെയും ആക്രമിക്കുകയും കുത്തുകയും ചെയ്തിരുന്നു.
ആർ.ടി.ഇയുടെ ‘മോണിംഗ് അയർലൻഡ്’ എന്ന പരിപാടിയിൽ സംസാരിക്കവെയാണ് ഡബ്ലിൻ ടൗൺ സി.ഇ.ഒ. റിച്ചാർഡ് ഗിനി ഈ നിർദ്ദേശങ്ങൾ മുന്നോട്ട് വെച്ചത്. ഡബ്ലിൻ നഗരത്തിലെ അക്രമങ്ങൾ ചിട്ടയായ രീതിയിൽ കൈകാര്യം ചെയ്യേണ്ടതുണ്ടെന്ന് അദ്ദേഹം പറഞ്ഞു. അക്രമത്തിൽ നിന്ന് സംരക്ഷിക്കാനും മറ്റ് കുട്ടികളെ അപകടകരമായ പ്രവൃത്തികളിൽ നിന്ന് പിന്തിരിപ്പിക്കാനും കർഫ്യൂവും പ്രവേശന വിലക്കുകളും പോലുള്ള കാര്യങ്ങൾ പരിഗണിക്കേണ്ടതുണ്ട്, ഗിനി പറഞ്ഞു.
കൂടുതൽ ഗാർഡൈ സേനാംഗങ്ങളെ വിന്യസിച്ചതിനെ അദ്ദേഹം സ്വാഗതം ചെയ്തു. ഏകദേശം 100 അധിക ഗാർഡൈ ഉദ്യോഗസ്ഥരെ നഗരമധ്യത്തിൽ നിയമിച്ചത് സഹായകരമാണെന്നും 999 എന്ന നമ്പറിലേക്കുള്ള കോളുകളുടെ എണ്ണം കുറഞ്ഞുവെന്നും അദ്ദേഹം അഭിപ്രായപ്പെട്ടു. എന്നാൽ, ഈ പ്രശ്നങ്ങൾക്ക് പരിഹാരം കാണുന്നതിന് 1,000 ഗാർഡൈ ഉദ്യോഗസ്ഥരെയാണ് ടാസ്ക് ഫോഴ്സ് ആവശ്യപ്പെട്ടതെന്ന് അദ്ദേഹം കൂട്ടിച്ചേർത്തു. കൂടാതെ, ഈ പ്രശ്നങ്ങളുടെ മൂലകാരണങ്ങളായ സാമൂഹിക വിഷയങ്ങളെയും അഭിസംബോധന ചെയ്യേണ്ടതുണ്ടെന്നും അദ്ദേഹം പറഞ്ഞു.നഗരത്തിലെ അക്രമങ്ങൾ ഒരു പ്രശ്നമാണെന്ന് ഗാർഡൈ സമ്മതിച്ചിട്ടുണ്ട്. ഈ വിഷയത്തിൽ പോലീസ് അന്വേഷണം ഊർജിതമാക്കിയിട്ടുണ്ട്.
