അയർലൻഡിൽ വാടകത്തട്ടിപ്പുകൾ വർധിക്കുന്നു വിദ്യാർത്ഥികൾ ജാഗ്രത പാലിക്കണമെന്ന് ഗാർഡ

അയർലൻഡിൽ വാടകയ്ക്ക് വീടുകൾ കിട്ടാനില്ലാത്ത സാഹചര്യത്തിൽ, വാടകത്തട്ടിപ്പുകൾ വർധിക്കുന്നതായി ഗാർഡ മുന്നറിയിപ്പ് നൽകി. പ്രത്യേകിച്ച് വിദ്യാർത്ഥികളാണ് ഇത്തരം തട്ടിപ്പുകൾക്ക് ഇരയാകുന്നത്. അതിനാൽ, വാടക വീടുകൾ അന്വേഷിക്കുമ്പോൾ കൂടുതൽ ശ്രദ്ധിക്കണമെന്നും ഗാർഡ അറിയിച്ചു.

തട്ടിപ്പുകളുടെ എണ്ണം കൂടുന്നു

2025-ന്റെ ആദ്യ ആറ് മാസങ്ങളിൽ വാടകത്തട്ടിപ്പ് കേസുകളിൽ 22% വർദ്ധനവാണ് രേഖപ്പെടുത്തിയത്. ലീവിങ് സെർട്ടിഫിക്കറ്റ് ഫലങ്ങൾ പുറത്തുവന്നതോടെ കോളേജ് പ്രവേശനത്തിനുള്ള സമയം അടുക്കുകയാണ്. ഈ സമയത്താണ് വാടകത്തട്ടിപ്പുകൾ കുത്തനെ ഉയരാറുള്ളത്. 2024-ൽ നടന്ന ആകെ തട്ടിപ്പുകളിൽ മൂന്നിലൊന്നും കോളേജ് അഡ്മിഷൻ കാലമായ ഓഗസ്റ്റ്, സെപ്റ്റംബർ മാസങ്ങളിലായിരുന്നു.

2025-ലെ ആദ്യ ആറ് മാസങ്ങളിൽ ഏകദേശം 160 വാടകത്തട്ടിപ്പ് കേസുകളാണ് ഗാർഡയ്ക്ക് റിപ്പോർട്ട് ചെയ്യപ്പെട്ടത്. ഇതിലൂടെ തട്ടിപ്പിന് ഇരയായവർക്ക് 385,000 യൂറോ നഷ്ടമായി. 2024-ൽ ആകെ 617,000 യൂറോയാണ് തട്ടിപ്പുകളിലൂടെ നഷ്ടപ്പെട്ടത്.

സാധാരണയായി, വാടകയ്ക്ക് താമസസ്ഥലം ലഭിക്കുന്നതിനായി ആളുകൾ അഡ്വാൻസ് തുക നൽകുകയും, പിന്നീട് അത് തട്ടിപ്പാണെന്ന് മനസ്സിലാക്കുകയും ചെയ്യുന്ന രീതിയിലാണ് തട്ടിപ്പുകൾ നടക്കുന്നത്. വീട്ടുടമ വിദേശത്താണ്, അതിനാൽ പണം നൽകിയാൽ മാത്രമേ വീട് കാണാൻ സാധിക്കൂ എന്ന് തട്ടിപ്പുകാർ പറഞ്ഞു വിശ്വസിപ്പിക്കാറുണ്ട്. ചിലർ ഒരു വീട് തന്നെ പലർക്കും കാണിച്ചു കൊടുത്ത ശേഷം അഡ്വാൻസ് വാങ്ങി മുങ്ങുന്ന സംഭവങ്ങളും സാധാരണമാണ്.

തട്ടിപ്പുകാരുടെ തന്ത്രങ്ങൾ തിരിച്ചറിയാം

ഗാർഡയുടെ സാമ്പത്തിക കുറ്റകൃത്യ വിഭാഗം (Garda National Economic Crime Bureau – GNECB) തട്ടിപ്പുകാരെ തിരിച്ചറിയാൻ ചില ലക്ഷണങ്ങൾ ചൂണ്ടിക്കാട്ടുന്നു.

• അമിതമായി കുറഞ്ഞ വാടക: തിരക്കേറിയ നഗരങ്ങളിൽ വളരെ കുറഞ്ഞ വാടകയ്ക്ക് വീട് ലഭിക്കുമെന്ന് പറയുന്ന പരസ്യങ്ങൾ പലപ്പോഴും തട്ടിപ്പാകാം. സോഷ്യൽ മീഡിയ വഴിയാണ് ഇത്തരം പരസ്യങ്ങൾ കൂടുതലായി പ്രചരിക്കുന്നത്.
• അപ്രതീക്ഷിത വാഗ്ദാനങ്ങൾ: നമ്മൾ ആവശ്യപ്പെടാതെ തന്നെ വലിയ വിലക്കുറവിൽ വാടകവീട് ലഭിക്കുമെന്നുള്ള സന്ദേശങ്ങളോ ഫോൺ വിളികളോ ലഭിച്ചാൽ ശ്രദ്ധിക്കുക. അഡ്വാൻസ് ഉടൻ നൽകിയില്ലെങ്കിൽ വീട് മറ്റൊരാൾക്ക് നൽകുമെന്ന് പറഞ്ഞ് സമ്മർദ്ദത്തിലാക്കാനും സാധ്യതയുണ്ട്.
• വിവരങ്ങൾ കുറഞ്ഞ പരസ്യങ്ങൾ: വീടിന്റെ കുറഞ്ഞ ചിത്രങ്ങൾ, പരസ്യം എഴുതിയതിലെ അക്ഷരത്തെറ്റുകൾ എന്നിവയും തട്ടിപ്പിന്റെ സൂചനകളാണ്.
• വീട് കാണിക്കാതെ പണം ആവശ്യപ്പെടുക: വീട് നേരിട്ട് കാണാൻ അനുവദിക്കാതെ പണം ആവശ്യപ്പെടുന്നത് തട്ടിപ്പിന്റെ പ്രധാന രീതിയാണ്. കരാറിൽ ഒപ്പിടുന്നതിന് മുമ്പ് പണം നൽകരുത്. നൽകുന്ന താക്കോൽ ഉപയോഗിച്ച് വാതിൽ തുറക്കാൻ കഴിയുമെന്ന് ഉറപ്പുവരുത്തുക.
• പണം കൈമാറുന്ന രീതി: പണം നേരിട്ട് നൽകാതെ അക്കൗണ്ട് വഴിയോ മറ്റ് ഡിജിറ്റൽ മാർഗങ്ങളിലൂടെയോ കൈമാറാൻ ശ്രമിക്കുക. തട്ടിപ്പിനിരയായാൽ പോലും അക്കൗണ്ട് വിവരങ്ങൾ വെച്ച് കുറ്റവാളികളെ കണ്ടെത്താൻ ഇത് സഹായിച്ചേക്കാം.

സുരക്ഷിതമായി വീട് കണ്ടെത്താൻ

• അംഗീകൃത ഏജൻസികൾ വഴിയോ വിശ്വസിക്കാവുന്ന പരിചയക്കാർ വഴിയോ മാത്രം വാടക വീടുകൾ അന്വേഷിക്കുക.
• അയർലൻഡിലെ വാടകക്കാരുടെ അവകാശങ്ങളെക്കുറിച്ചും നിയമങ്ങളെക്കുറിച്ചും മനസ്സിലാക്കുന്നത് തട്ടിപ്പിൽ നിന്ന് രക്ഷപ്പെടാൻ സഹായിക്കും.
• Residential Tenancies Board (RTB)-ൽ രജിസ്റ്റർ ചെയ്ത വീടുകൾ മാത്രം വാടകയ്ക്ക് എടുക്കുന്നത് തട്ടിപ്പ് ഒഴിവാക്കാൻ ഏറ്റവും ഉചിതമായ മാർഗമാണ്.