വത്തിക്കാൻ: വലിയ ഇടയന് വിട. ആഗോള കത്തോലിക്കാ സഭയുടെ തലവന് ഫ്രാന്സിസ് മാര്പാപ്പ ദിവംഗതനായി. 88 വയസ്സായിരുന്നു. ചരിത്രം തിരുത്തിക്കുറിച്ചാണ് 2013 മാര്ച്ച് 13-ന് അര്ജന്റീനയിലെ ബ്യൂണസ് ഐറിസില്നിന്നുള്ള കര്ദിനാള് മാരിയോ ബെര്ഗോളിയ കത്തോലിക്കാ സഭയുടെ 266-ാമത് മാര്പാപ്പയായി തിരഞ്ഞെടുക്കപ്പെട്ടത്. ലാറ്റിന് അമേരിക്കയില് നിന്നുള്ള ആദ്യപാപ്പയായിരുന്നു പിന്നീട് ഫ്രാന്സിസ് മാര്പാപ്പ എന്നറിയപ്പെട്ട മാരിയോ ബെര്ഗോളിയ. 1,272 വര്ഷങ്ങള്ക്കു ശേഷമായിരുന്നു യൂറോപ്പിനു പുറത്തുനിന്ന് ഒരാള് മാര്പാപ്പയായി തിരഞ്ഞെടുക്കപ്പെടുന്നത്. പ്രാദേശിക സമയം 7.35-നാണ് അന്ത്യം സംഭവിച്ചതെന്ന് വത്തിക്കാൻ അറിയിച്ചു. ക്രിസ്തുവിന്റെ പീഢാനുഭവത്തിരുന്നാളും ഉത്ഥാനവും അനുസ്മരിച്ച് ഈസ്റ്റര് സന്ദേശം നല്കിയാണ് പാപ്പ നിത്യതയിലേക്ക് ചേർക്കപ്പെട്ടത്. അദ്ദേഹത്തിന്റെ അവസാനവാക്കുകളും മാനവികതയുടെ പ്രത്യാശയായി മാറി. യുദ്ധം അവസാനിപ്പിക്കാനും ലോകസമാധാനത്തിനും ആഹ്വാനം ചെയ്തശേഷമാണ് മാർപാപ്പ ഈ ലോകത്തുനിന്നു മടങ്ങിയത്.
ശാരീരിക അവശതകള് മൂലം ബെനഡിക്ട് പതിനാറാമന് മാര്പാപ്പ 2013 ഫെബ്രുവരി 28-ന് രാജിവെച്ചതിനെ തുടര്ന്നാണ് കര്ദിനാള് ഹോര്ഹെ മാരിയോ ബെര്ഗോളിയോയെ മാര്പാപ്പയായി തിരഞ്ഞെടുത്തത്.
ബ്യൂണസ് ഐറിസിലെ ആര്ച്ച് ബിഷപ്പായിരുന്ന ഹോര്ഹെ മാരിയോ ബെര്ഗോളിയോ ലാറ്റിനമേരിക്കയില് നിന്നുള്ള ആദ്യ പാപ്പയായി തിരഞ്ഞെടുക്കപ്പെട്ടത് തീര്ത്തും അപ്രതീക്ഷിതമായിട്ടായിരുന്നു. അന്ന് 78 വയസായിരുന്നു അദ്ദേഹത്തിന്. 2001-ലാണ് ബെര്ഗോളിയോ കര്ദ്ദിനാള് പദവിയിലേക്ക് ഉയര്ത്തപ്പെട്ടത്. ജോണ്പോള് രണ്ടാമന് മാര്പാപ്പയാണ് 2001-ല് ബെര്ഗോളിയോയെ വത്തിക്കാനിലേക്ക് കൊണ്ടുവരുന്നത്. കര്ദ്ദിനാള് എന്ന നിലയില് ഒട്ടേറെ ഭരണപരമായ ചുമതലകള് വഹിച്ച അദ്ദേഹം തീര്ത്തും വ്യത്യസ്തനായിരുന്നു. വിനയാന്വിതമായ പെരുമാറ്റം, സാമൂഹ്യനീതിക്കുവേണ്ടിയുള്ള പ്രവര്ത്തനങ്ങള് എന്നിവയും കര്ദ്ദിനാള് എന്ന നിലയില് അദ്ദേഹത്തെ വ്യത്യസ്തനാക്കി. ആഡംബര വാഹനം ഒഴിവാക്കി പൊതുഗതാഗത സംവിധാനത്തിലായിരുന്നു അദ്ദേഹത്തിന്റെ യാത്രകള്. ഭക്ഷണം സ്വയം പാചകം ചെയ്യുന്നതായിരുന്നു അക്കാലത്ത് അദ്ദേഹത്തിന്റെ രീതി.
1936 ഡിസംബര് 17-ന് അര്ജന്റീനയിലെ ബ്യൂണസ് ഐറിസില് റെയില്വേ തൊഴിലാളിയായ മരിയോ ജോസ് ബെര്ഗോളിയോയുടെയും സാധാരണക്കാരിയായ വീട്ടമ്മ മരിയ സിവോറിയയുടെയും അഞ്ചു മക്കളില് ഒരാളായി ജനനം. ഇറ്റലിയില്നിന്നു കുടിയേറിയ ഒരു മധ്യവര്ഗ കുടുംബമായിരുന്നു ഫ്രാന്സിസ് പാപ്പയുടേത്. സാധാരണ കുടുംബത്തില് ജനിച്ച്, അവരുടെ പ്രശ്നങ്ങള് കണ്ടറിഞ്ഞും ഇടപഴകിയും വളര്ന്നതിനാല് താഴേക്കിടയിലുള്ളവര്ക്ക് അദ്ദേഹം പ്രത്യേകം പരിഗണന നല്കിയിരുന്നു.
എല്ലായ്പ്പോഴും ശാന്തനും പ്രസന്നവദനനുമായിരുന്നു എന്നുള്ളതാണ് അദ്ദേഹത്തിന്റെ പ്രത്യേകതകളിലൊന്ന്. അണുബാധയെത്തുടര്ന്ന് ശ്വാസകോശങ്ങളിലൊന്ന് നീക്കം ചെയ്ത് പത്തു വര്ഷത്തിനുശേഷം 32-ാം വയസ്സിലാണ് അദ്ദേഹം വൈദികപട്ടം ഏറ്റെടുക്കുന്നത്. താമസിച്ചാണ് പുരോഹിതപദവിയിൽ എത്തിയതെങ്കിലും നാല് വര്ഷത്തിനുള്ളില് അര്ജന്റീനയിലെ ജസ്യൂട്ട് സഭയുടെ പ്രൊവിന്ഷ്യലായി അദ്ദേഹം തിരഞ്ഞെടുക്കപ്പെട്ടു. 1973 മുതല് 79 വരെ പ്രൊവിന്ഷ്യന് സ്ഥാനം അലങ്കരിച്ചു. 1992-ല് ബ്യൂണസ് ഐറിസിലെ സഹായ മെത്രാനും 98-ല് ആര്ച്ച് ബിഷപ്പുമായി തിരഞ്ഞെടുക്കപ്പെട്ടു. 2001-ല് ജോണ് പോള് രണ്ടാമന് മാര്പാപ്പ ബെര്ഗോളിയോയെ കര്ദിനാള് സ്ഥാനത്ത് അവരോധിച്ചു. കര്ദിനാള് ആയി തിരഞ്ഞെടുക്കപ്പെട്ടശേഷം, തന്റെ മുന്ഗാമികള് അനുഭവിച്ചുവന്നിരുന്ന പല സുഖസൗകര്യങ്ങളും അദ്ദേഹം ഉപേക്ഷിച്ചിരുന്നു. പ്രദേശത്തെ ചേരികള് സന്ദര്ശിക്കുന്നതിലും അവരെ സഹായിക്കുന്നതിലും അദ്ദേഹം ഏറെ താത്പര്യം പ്രകടിപ്പിച്ചിരുന്നു. മാധ്യമങ്ങള്ക്ക് അദ്ദേഹം അഭിമുഖങ്ങള് നല്കിയിരുന്നില്ല. പ്രസംഗവേദികളോടും ഭ്രമമില്ല. തനിക്കെതിരെ ഉന്നയിക്കുന്ന ആരോപണം തെറ്റാണെന്നു ബോധ്യമുണ്ടെങ്കില്പോലും വിമര്ശകരോട് ശണ്ഠ കൂടാറില്ല.
