ഡൊണഗൽ: അയർലൻഡിലെ ഡൊണഗലിൽ പവർ ടൂളുകളും റേഡിയേറ്ററുകളും മോഷ്ടിച്ച കേസിൽ സ്ലൈഗോ സ്വദേശികളായ അച്ഛനും മകനും ജയിൽ ശിക്ഷ വിധിച്ചു. സ്ലൈഗോ ഫിനിസ്ക്ലിൻ സ്വദേശികളായ വില്യം (49), മകൻ ഹഗ് മക്ഗിൻലി (28) എന്നിവരെയാണ് ഡൊണഗൽ സർക്യൂട്ട് കോടതി ശിക്ഷിച്ചത്.
2022 മാർച്ചിൽ ഡൊണഗലിലെ ഗ്ലെന്റീസിലുള്ള ഒരു ഷെഡിൽ നിന്ന് പവർ വാഷറും ചെയിൻസോയും മോഷ്ടിച്ചതായും സമീപത്തെ മറ്റൊരു സ്ഥലത്ത് നിന്ന് 20 റേഡിയേറ്ററുകൾ കവർന്നതായും ഇവർ കോടതിയിൽ സമ്മതിച്ചു. മോഷണസമയത്ത് അവിടെയുണ്ടായിരുന്ന 17 വയസ്സുകാരനായ കൗമാരക്കാരനെ ഇവർ ഭീഷണിപ്പെടുത്തിയതായും കോടതി കണ്ടെത്തി.
പ്രായപൂർത്തിയാകാത്ത കുട്ടിയെ ഭയപ്പെടുത്തി മോഷണം നടത്തിയതിനെ ജഡ്ജി ജോൺ അയ്ൽമർ രൂക്ഷമായി വിമർശിച്ചു. കേസിൽ മകൻ ഹഗ് മക്ഗിൻലിക്ക് രണ്ട് വർഷം തടവും അച്ഛൻ വില്യം മക്ഗിൻലിക്ക് 20 മാസം തടവുമാണ് കോടതി വിധിച്ചത്. ഇരകൾക്ക് നഷ്ടപരിഹാരമായി 1,000 യൂറോ നൽകാൻ തയ്യാറാണെന്ന് പ്രതികൾ കോടതിയെ അറിയിച്ചിരുന്നു.
