ഡബ്ലിൻ– ഉപപ്രധാനമന്ത്രി (ടാനാസ്റ്റെ) സൈമൺ ഹാരിസിനുള്ള ഗവൺമെന്റിന്റെ വിശ്വാസ പ്രമേയം ഇന്ന് ഉച്ചയ്ക്ക് ഡെയ്‌ൽ ഐറിനിൽ (ഐറിഷ് പാർലമെന്റ്) ചർച്ച ചെയ്യുകയും വോട്ടിനിടുകയും ചെയ്യും. പ്രതിപക്ഷ പാർട്ടിയായ ഓണ്ടു (Aontú) അടുത്ത ആഴ്ച ടാനാസ്റ്റെയ്‌ക്കെതിരെ അവിശ്വാസ പ്രമേയം കൊണ്ടുവരാൻ പദ്ധതിയിട്ടിരുന്ന സാഹചര്യത്തിൽ അതിനെ മറികടക്കാൻ വേണ്ടിയുള്ള സർക്കാരിന്റെ തന്ത്രപരമായ നീക്കമാണിത്.
മിസ്റ്റർ ഹാരിസ് ആരോഗ്യ മന്ത്രിയായിരിക്കുമ്പോൾ കുട്ടികളുടെ ശസ്ത്രക്രിയ കാത്തിരിപ്പ് പട്ടികയുടെ കാര്യത്തിൽ വരുത്തിയ വീഴ്ചകളിലുള്ള വിമർശനങ്ങളാണ് ഈ പ്രമേയത്തിന് വഴിയൊരുക്കിയത്. ഹാരിസ് നൽകിയ “വാഗ്ദാനം പാലിക്കുന്നതിൽ കാര്യമായ പരാജയപ്പെട്ടു” എന്ന് ഓണ്ടു നേതാവ് പീഡർ ടോബിൻ വിമർശിച്ചു. സ്കോളിയോസിസ് ശസ്ത്രക്രിയകൾക്കായി കുട്ടികൾ നാല് മാസത്തിൽ കൂടുതൽ കാത്തിരിക്കേണ്ടിവരില്ല എന്നായിരുന്നു ഹാരിസിന്റെ പ്രഖ്യാപനം.
ചിൽഡ്രൻസ് ഹെൽത്ത് അയർലൻഡിലെ (CHI) “പ്രതിസന്ധി”, കൂടാതെ ഈ വേനൽക്കാലത്ത് സ്പൈന ബിഫിഡയും സ്കോളിയോസിസുമുണ്ടായിരുന്ന ഒൻപതു വയസ്സുകാരനായ ഹാർവി മോറിസൻ്റെ ദാരുണമായ മരണം എന്നിവയെല്ലാം ചർച്ചയിൽ ഉയർന്നു വരും. അടിയന്തിര സ്കോളിയോസിസ് ശസ്ത്രക്രിയക്കായി ജീവിതത്തിലുടനീളം നിരവധി കാലതാമസങ്ങൾ നേരിട്ടതിന് ശേഷമാണ് ഹാർവി ജൂലൈയിൽ മരണപ്പെട്ടത്. അടുത്തിടെ മിസ്റ്റർ ഹാരിസും ആരോഗ്യ മന്ത്രി ജെന്നിഫർ കരോൾ മാക്നീലും ഹാർവിയുടെ മാതാപിതാക്കളുമായി കൂടിക്കാഴ്ച നടത്തിയിരുന്നു.
ടാനാസ്റ്റെയെ പിന്തുണച്ചുകൊണ്ട് വിശ്വാസ പ്രമേയം പാസ്സാക്കാനുള്ള ഭൂരിപക്ഷം ഭരണകക്ഷിക്ക് ഡെയ്‌ലിൽ ഉണ്ടെങ്കിലും, കുട്ടികളുടെ ആരോഗ്യരംഗത്തെ സർക്കാരിന്റെ പ്രകടനം പ്രതിപക്ഷത്തിന്റെ കടുത്ത വിമർശനത്തിന് വിധേയമാകും. കാത്തിരിപ്പ് പട്ടികയുടെ നീളവും CHI യുടെ ഭരണപരമായ വിഷയങ്ങളും ഇന്നത്തെ ചർച്ചകളിൽ പ്രധാന വിഷയങ്ങളാകും.
