അഞ്ചു വർഷത്തെ വിലക്കിന് ശേഷം പാകിസ്ഥാൻ ഇൻ്റർനാഷണൽ എയർലൈൻസ് (PIA) യു.കെയിലേക്ക് നേരിട്ടുള്ള വിമാന സർവീസുകൾ പുനരാരംഭിച്ചു. ഇസ്ലാമാബാദ് ഇൻ്റർനാഷണൽ എയർപോർട്ടിൽ നടന്ന ചടങ്ങിന് ശേഷം ഇസ്ലാമാബാദിൽ നിന്ന് മാഞ്ചസ്റ്ററിലേക്കാണ് ആദ്യ വിമാനം പറന്നത്.
പ്രതിരോധ മന്ത്രി ആസിഫ് ചടങ്ങിൽ പങ്കെടുക്കുകയും, ഈ സർവീസ് ഇരു രാജ്യങ്ങളും തമ്മിലുള്ള ബന്ധം ശക്തിപ്പെടുത്തുമെന്നും ബ്രിട്ടനിലെ 1.6 ദശലക്ഷത്തിലധികം വരുന്ന പാകിസ്ഥാനികൾക്ക് പ്രയോജനകരമാകുമെന്നും അഭിപ്രായപ്പെട്ടു. തുടക്കത്തിൽ ആഴ്ചയിൽ രണ്ട് സർവീസുകളാണ് പി.ഐ.എ നടത്തുക. നഷ്ടത്തിൽ പ്രവർത്തിക്കുന്ന എയർലൈൻ സ്വകാര്യവൽക്കരിക്കാനുള്ള നീക്കങ്ങൾക്കിടെയാണ് വിലക്ക് നീക്കിയത്. ഈ അഞ്ച് വർഷത്തെ വിലക്ക് കാരണം ഏകദേശം 40 ബില്യൺ PKR (ഏകദേശം 144 ദശലക്ഷം യു.എസ്. ഡോളർ) വാർഷിക വരുമാന നഷ്ടം PIAയ്ക്ക് സംഭവിച്ചതായും കണക്കാക്കുന്നു.
