ലോകമെമ്പാടും വർദ്ധിച്ചുവരുന്ന യുദ്ധസാഹചര്യങ്ങളും ആഭ്യന്തര കലാപങ്ങളും കണക്കിലെടുത്ത്, അയർലണ്ട് വിദേശകാര്യ മന്ത്രാലയം (DFA) തങ്ങളുടെ ‘ഡു നോട്ട് ട്രാവൽ’ (Do Not Travel) പട്ടിക പുതുക്കി. നിലവിൽ 24 രാജ്യങ്ങളാണ് ഈ റെഡ് ലിസ്റ്റിൽ ഉള്ളത്. ഈ രാജ്യങ്ങളിലേക്കുള്ള യാത്രകൾ ഒഴിവാക്കണമെന്നും, നിയമം ലംഘിച്ച് അവിടേക്ക് പോകുന്നവർക്ക് ട്രാവൽ ഇൻഷുറൻസ് ആനുകൂല്യങ്ങൾ ലഭിക്കില്ലെന്നും സർക്കാർ കർശന മുന്നറിയിപ്പ് നൽകി.
ഏതൊക്കെയാണ് ആ രാജ്യങ്ങൾ?
റഷ്യ-ഉക്രെയ്ൻ യുദ്ധം, മിഡിൽ ഈസ്റ്റിലെ പുതിയ സംഘർഷങ്ങൾ എന്നിവ കാരണം ഉക്രെയ്ൻ, റഷ്യ, ഇറാൻ, ഇറാഖ്, ഇസ്രായേൽ, പലസ്തീൻ, ലെബനൻ തുടങ്ങിയ രാജ്യങ്ങൾ പട്ടികയിൽ ഒന്നാമതുണ്ട്. കൂടാതെ അഫ്ഗാനിസ്ഥാൻ, യെമൻ, സിറിയ, ലിബിയ, സോമാലിയ, സുഡാൻ തുടങ്ങി ആഭ്യന്തര യുദ്ധം രൂക്ഷമായ രാജ്യങ്ങളും ഇതിൽ ഉൾപ്പെടുന്നു. ഈ രാജ്യങ്ങളിൽ അയർലണ്ടിന് നയതന്ത്ര സഹായം (Consular Assistance) നൽകാനുള്ള ശേഷി പരിമിതമാണെന്നും റിപ്പോർട്ട് വ്യക്തമാക്കുന്നു.
ഇൻഷുറൻസിനെ എങ്ങനെ ബാധിക്കുന്നു?
ഒരു രാജ്യം ‘ഡു നോട്ട് ട്രാവൽ’ പട്ടികയിൽ വന്നാൽ, അവിടേക്കുള്ള യാത്ര നിങ്ങളുടെ ഇൻഷുറൻസ് കരാറിന്റെ ലംഘനമായി കണക്കാക്കും. ഇൻഷുറൻസ് കമ്പനികൾ നൽകുന്ന പോളിസികളിൽ ‘വാർ എക്സ്ക്ലൂഷൻ’ (War Exclusion) എന്നൊരു നിബന്ധനയുണ്ട്. യുദ്ധം നടക്കുന്ന സ്ഥലങ്ങളിൽ വെച്ച് നിങ്ങൾക്ക് എന്തെങ്കിലും അപകടമോ അസുഖമോ സംഭവിച്ചാൽ അതിന്റെ ചികിത്സാ ചെലവോ മൃതദേഹം നാട്ടിലെത്തിക്കാനുള്ള ചെലവോ ഇൻഷുറൻസ് കമ്പനി വഹിക്കില്ല. ലക്ഷക്കണക്കിന് രൂപ വരുന്ന ഇത്തരം ചെലവുകൾ യാത്രക്കാരൻ തന്നെ വഹിക്കേണ്ടി വരും.
അയർലണ്ടിലെ വലിയൊരു വിഭാഗം മലയാളികൾ ജോലി ചെയ്യുന്ന യു.എ.ഇ (UAE), സൗദി അറേബ്യ, ഖത്തർ തുടങ്ങിയ രാജ്യങ്ങളെ ഇപ്പോൾ ‘അവോയ്ഡ് നോൺ-എസൻഷ്യൽ ട്രാവൽ’ (Avoid Non-Essential Travel) അഥവാ അത്യാവശ്യമല്ലാത്ത യാത്രകൾ ഒഴിവാക്കുക എന്ന ഓറഞ്ച് പട്ടികയിലാണ് പെടുത്തിയിരിക്കുന്നത്. വിനോദയാത്രകൾക്കായി ഈ രാജ്യങ്ങൾ തിരഞ്ഞെടുക്കുന്നവർ ഇൻഷുറൻസ് കമ്പനിയുമായി ബന്ധപ്പെട്ട് പരിരക്ഷ ഉറപ്പാക്കേണ്ടതുണ്ട്. ജോലി സംബന്ധമായ യാത്രകൾക്ക് (Essential Travel) സാധാരണയായി തടസ്സമുണ്ടാകാറില്ലെങ്കിലും അപ്രതീക്ഷിതമായി വിമാനങ്ങൾ റദ്ദാക്കിയാൽ ഇൻഷുറൻസ് ലഭിക്കാൻ പ്രയാസമായിരിക്കും.
അയർലണ്ടിൽ താമസിക്കുന്ന മലയാളികൾ നാട്ടിലേക്ക് പോകുമ്പോഴോ മറ്റ് രാജ്യങ്ങൾ സന്ദർശിക്കുമ്പോഴോ ശ്രദ്ധിക്കേണ്ട കാര്യങ്ങൾ:
- TravelWise App: വിദേശകാര്യ മന്ത്രാലയത്തിന്റെ ഈ ആപ്പ് ഫോണിൽ ഇൻസ്റ്റാൾ ചെയ്യുക. ഓരോ രാജ്യത്തെയും സുരക്ഷാ മാറ്റങ്ങൾ ഇതിലൂടെ തത്സമയം അറിയാം.
- രജിസ്ട്രേഷൻ: യാത്രയ്ക്ക് മുൻപ് ഡി.എഫ്.എ വെബ്സൈറ്റിൽ പേര് രജിസ്റ്റർ ചെയ്യുന്നത് അടിയന്തര സാഹചര്യങ്ങളിൽ സർക്കാരിന് നിങ്ങളെ ബന്ധപ്പെടാൻ സഹായിക്കും.
- കണക്റ്റിംഗ് ഫ്ലൈറ്റുകൾ: ദുബായ്, ദോഹ തുടങ്ങിയ സ്ഥലങ്ങൾ വഴി കണക്റ്റിംഗ് ഫ്ലൈറ്റുകൾ ബുക്ക് ചെയ്തവർ യുദ്ധസാഹചര്യം കാരണം വിമാനങ്ങൾ വഴിതിരിച്ചുവിടാൻ സാധ്യതയുള്ളതിനാൽ എയർലൈനുമായി ബന്ധപ്പെടുക.
യാത്ര റദ്ദാക്കിയാൽ എന്ത് സംഭവിക്കും?
നിങ്ങൾ ഒരു ട്രാവൽ ഏജന്റ് വഴിയാണ് ടിക്കറ്റ് ബുക്ക് ചെയ്തതെങ്കിൽ, സർക്കാർ ‘ഡു നോട്ട് ട്രാവൽ’ മുന്നറിയിപ്പ് നൽകിയാൽ നിങ്ങൾക്ക് പണം തിരികെ ലഭിക്കാനോ യാത്ര മറ്റൊരു തീയതിയിലേക്ക് മാറ്റാനോ നിയമപരമായ അവകാശമുണ്ട് (Package Travel Directive). എന്നാൽ മുന്നറിയിപ്പ് അവഗണിച്ച് യാത്രയുമായി മുന്നോട്ട് പോയാൽ ഉണ്ടാകുന്ന നഷ്ടങ്ങൾക്ക് നിങ്ങൾ മാത്രമായിരിക്കും ഉത്തരവാദി.