അയർലണ്ടിലെ പ്രവാസികൾക്ക് ആശ്വാസം; കാലാവധി കഴിഞ്ഞ ഐ.ആർ.പി കാർഡുമായി യാത്ര ചെയ്യാനും ജോലി ചെയ്യാനും അനുമതി

അയർലണ്ടിലെ ഡബ്ലിനിലുള്ള പ്രധാന ഇമിഗ്രേഷൻ ഓഫീസായ ബർഗ് ക്വേയിലെ കടുത്ത അപേക്ഷാ ബാക്ക്‌ലോഗ് മൂലം നിയമപരമായി താമസിക്കുന്ന ആയിരക്കണക്കിന് നോൺ-ഇ.ഇ.എ (Non-EEA) പൗരന്മാർക്ക് ജോലി നഷ്ടപ്പെടാനോ യാത്രാ തടസ്സം നേരിടാനോ ഉള്ള സാഹചര്യം ഒഴിവാക്കാൻ അയർലണ്ട് നീതിന്യായ വകുപ്പ് അടിയന്തിര നടപടികൾ പ്രഖ്യാപിച്ചു. ഐ.ആർ.പി (Irish Residence Permit) കാർഡുകൾ പുതുക്കുന്നതിനുള്ള സമയപരിധി നിലവിൽ 17 ആഴ്ചയിലധികമായി വർദ്ധിച്ച സാഹചര്യത്തിലാണ് ഈ തീരുമാനം. അപേക്ഷ അംഗീകരിച്ചതിന് ശേഷം പുതിയ കാർഡ് പ്രിന്റ് ചെയ്ത് തപാലിൽ വരാൻ വീണ്ടും രണ്ടാഴ്ചയോളം അധികമെടുക്കുന്നുണ്ട്. ഇതോടെയാണ് കാലാവധി കഴിഞ്ഞ കാർഡുകൾ ഉപയോഗിച്ച് താൽക്കാലികമായി വിദേശയാത്ര ചെയ്യാനും തൊഴിൽ മേഖലകളിൽ തുടരാനും സർക്കാർ പ്രത്യേക അനുമതി നൽകിയത്.

പ്രവാസികൾക്ക്, പ്രത്യേകിച്ച് അയർലണ്ടിലെ വലിയൊരു വിഭാഗം വരുന്ന മലയാളി കമ്മ്യൂണിറ്റിക്ക് ഏറെ ആശ്വാസം നൽകുന്ന രണ്ട് പ്രധാന താൽക്കാലിക ഉത്തരവുകളാണ് പുറപ്പെടുവിച്ചിരിക്കുന്നത്. സമ്മർ അവധിക്കാലത്തെ യാത്രകളെ ബാധിക്കാതിരിക്കാനുള്ള പ്രത്യേക യാത്രാ അനുമതിയും, ജോലിയെ ബാധിക്കാതിരിക്കാനുള്ള തൊഴിലുടമകൾക്കുള്ള (Employers) പ്രത്യേക നിർദ്ദേശവുമാണ് ഇതിൽ ഉൾപ്പെടുന്നത്.

യാത്രാ ഇളവുകൾ

സാധാരണ നിയമപ്രകാരം അയർലണ്ടിലെ നോൺ-ഇ.ഇ.എ പൗരന്മാർക്ക് വിദേശയാത്ര കഴിഞ്ഞ് തിരികെ വരണമെങ്കിൽ കാലാവധിയുള്ള ഐ.ആർ.പി കാർഡ് നിർബന്ധമാണ്. എന്നാൽ നിലവിലെ പ്രതിസന്ധി പരിഹരിക്കാൻ സർക്കാർ ഒരു ‘ട്രാവൽ കൺഫർമേഷൻ നോട്ടീസ്’ പുറപ്പെടുവിച്ചു. ജൂലൈ 13, 2026 മുതൽ ആഗസ്റ്റ് 31, 2026 വരെയുള്ള കാലയളവിലാണ് ഈ ഇളവ് ബാധകം.

തങ്ങളുടെ നിലവിലെ ഐ.ആർ.പി കാർഡിന്റെ കാലാവധി തീരുന്നതിന് മുൻപായി തന്നെ ഓൺലൈൻ വഴി പുതുക്കാനുള്ള അപേക്ഷ സമർപ്പിച്ചവർക്ക് മാത്രമേ ഈ ആനുകൂല്യം ലഭിക്കുകയുള്ളൂ. യാത്ര ചെയ്യുന്നവർ ഇമിഗ്രേഷൻ വെബ്‌സൈറ്റിൽ നിന്നും ഈ പ്രത്യേക യാത്രാ നോട്ടീസ് ഡൗൺലോഡ് ചെയ്ത് പ്രിന്റ് എടുക്കണം. യാത്ര വേളയിൽ ഈ പ്രിന്റൗട്ട്, കാലാവധി കഴിഞ്ഞ ഐ.ആർ.പി കാർഡ്, അപേക്ഷ സമർപ്പിച്ചപ്പോൾ ലഭിച്ച ഡിജിറ്റൽ റെസീപ്റ്റ് (OREG നമ്പർ അടങ്ങിയ ഇമെയിൽ) എന്നിവ എയർലൈൻ അധികൃതർക്കും ബോർഡർ കൺട്രോൾ ഉദ്യോഗസ്ഥർക്കും മുന്നിൽ ഹാജരാക്കേണ്ടതുണ്ട്. അന്താരാഷ്ട്ര എയർലൈനുകളെയും വിദേശ എംബസികളെയും ഈ തീരുമാനത്തെക്കുറിച്ച് അറിയിച്ചിട്ടുണ്ടെന്ന് ഡിപ്പാർട്ട്മെന്റ് വ്യക്തമാക്കിയിട്ടുണ്ട്. എങ്കിലും, യാത്രയ്ക്ക് മുൻപായി അതാത് എയർലൈനുകളുമായി ബന്ധപ്പെട്ട് ഇത് ഉറപ്പുവരുത്തണമെന്നും, മറ്റ് രാജ്യങ്ങൾ വഴി ട്രാൻസിറ്റ് ഉള്ളവർ ആ രാജ്യങ്ങളിലെ നിയമങ്ങൾ മുൻകൂട്ടി പരിശോധിക്കണമെന്നും കർശന നിർദ്ദേശമുണ്ട്.

ജീവനക്കാർക്കും തൊഴിലുടമകൾക്കുമുള്ള സംരക്ഷണം

ഐ.ആർ.പി കാർഡിന്റെ കാലാവധി കഴിഞ്ഞവർക്ക് ജോലി നൽകുന്നത് അയർലണ്ടിലെ നിയമപ്രകാരം തൊഴിലുടമകൾക്ക് വലിയ പിഴ ശിക്ഷ ലഭിക്കാവുന്ന കുറ്റമാണ്. മുൻപ് ഇതിനായി 12 ആഴ്ചത്തെ ഇളവ് നൽകിയിരുന്നെങ്കിലും ഇപ്പോഴത്തെ വലിയ വൈകൽ കാരണം അത് പര്യാപ്തമല്ലാതെ വരികയായിരുന്നു. പുതിയ ഇടക്കാല ഉത്തരവ് പ്രകാരം, ഈ സമയപരിധി പൂർണ്ണമായും ഒഴിവാക്കി.

തങ്ങളുടെ ഐ.ആർ.പി കാർഡ് കാലാവധി തീരുന്നതിന് മുൻപ് പുതുക്കാൻ അപേക്ഷ നൽകിയിട്ടുള്ള ജീവനക്കാർക്ക്, അവരുടെ അപേക്ഷ പ്രോസസിംഗിൽ ഇരിക്കുന്ന കാലയളവിലുടനീളം നിലവിലുള്ള അതേ വിസ നിബന്ധനകളോടെ അയർലണ്ടിൽ തുടരാനും ജോലി ചെയ്യാനും നിയമപരമായ അനുമതിയുണ്ടാകും. വ്യത്യസ്ത സ്റ്റാമ്പുകളിലേക്ക് (ഉദാഹരണത്തിന് സ്റ്റാമ്പ് 1-ൽ നിന്ന് സ്റ്റാമ്പ് 4-ലേക്ക്) മാറുന്നവർക്കും ഈ ആനുകൂല്യം ലഭിക്കും. ഓൺലൈൻ അപേക്ഷ പൂർത്തിയാകുമ്പോൾ ലഭിക്കുന്ന കൺഫർമേഷൻ ഇമെയിൽ പുതിയ കാർഡ് കൈപ്പറ്റുന്നത് വരെ നിയമപരമായ രേഖയായി തൊഴിലുടമകൾക്ക് മുന്നിൽ കാണിക്കാവുന്നതാണ്. യാത്രാ ഇളവുകൾ ആഗസ്റ്റ് 31-ന് അവസാനിക്കുമെങ്കിലും, തൊഴിൽ സംബന്ധമായ ഈ ഇളവുകൾ ബാക്ക്‌ലോഗ് തീരുന്നതുവരെ തുടരുമെന്ന് മന്ത്രാലയം അറിയിച്ചു.