കഴിഞ്ഞ ദിവസം മുതൽ കാണാതായ മലയാളി ഐ.ടി പ്രൊഫഷണൽ അശ്വതി രാജശേഖരന്റെ (31) മൃതദേഹം കണ്ടെത്തി. ഞായറാഴ്ച രാവിലെ ബ്രേ (Bray) മേഖലയിലെ കടലിൽ നിന്നാണ് മൃതദേഹം കണ്ടെടുത്തത്. ആശുപത്രിയിലെത്തിയ സുഹൃത്തുക്കളാണ് മൃതദേഹം തിരിച്ചറിഞ്ഞത്.
ഡബ്ലിൻ ഗ്രാഫ്റ്റൺ സ്ട്രീറ്റിലെ ഹെയ്സ് കൺസൾട്ടൻസിയിൽ ഐ.ടി ഉദ്യോഗസ്ഥയായിരുന്ന അശ്വതിയെ ലുവാസ് യാത്രയ്ക്ക് ശേഷമാണ് കാണാതായത്. സുഹൃത്തുക്കൾ നൽകിയ പരാതിയെത്തുടർന്ന് ഡാൽകി (Dalkey), കില്ലിനി (Killiney) തീരപ്രദേശങ്ങളിൽ കോസ്റ്റ് ഗാർഡും ഹെലികോപ്റ്ററുകളും ഉൾപ്പെടെ വിപുലമായ തിരച്ചിൽ നടത്തിയിരുന്നു. തിരച്ചിലിനിടെ ഡാൽകി ബീച്ചിന് സമീപത്തുനിന്ന് അശ്വതിയുടെ ലാപ്ടോപ്പും ബാഗും കണ്ടെത്തിയിരുന്നു.
ബെംഗളൂരുവിൽനിന്ന് അയർലൻഡിലെത്തിയ അശ്വതി ആദ്യം ചെറിവുഡിലായിരുന്നു ജോലി ചെയ്തിരുന്നത്. അടുത്തിടെ ഇവർക്ക് ലെറ്റർക്കെന്നിയിലേക്ക് (Letterkenny) ജോലി സംബന്ധമായ സ്ഥലംമാറ്റം ലഭിച്ചിരുന്നു. പുതിയ സ്ഥലത്തേക്ക് മാറാനുള്ള തയ്യാറെടുപ്പുകൾക്കിടെയാണ് പ്രിയപ്പെട്ടവരെയെല്ലാം സങ്കടത്തിലാഴ്ത്തി ഈ അപകടം സംഭവിക്കുന്നത്.
നിലവിൽ പോസ്റ്റ്മോർട്ടം നടപടികൾക്കായി മൃതദേഹം ലോക്ലിൻസ്റ്റൗൺ (Loughlinstown) ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നടപടിക്രമങ്ങൾ പൂർത്തിയാക്കിയ ശേഷം സംസ്കാരം സംബന്ധിച്ച തീരുമാനങ്ങൾ അറിയിക്കുമെന്ന് ബന്ധപ്പെട്ടവർ വ്യക്തമാക്കി.
അശ്വതിയുടെ അപ്രതീക്ഷിത വിയോഗത്തിൽ അയർലൻഡിലെ മലയാളി സംഘടനകളും സഹപ്രവർത്തകരും ആഴത്തിലുള്ള അനുശോചനം രേഖപ്പെടുത്തി. ഈ കഠിനമായ സമയത്ത് അവരുടെ കുടുംബത്തെയും സുഹൃത്തുക്കളെയും ആശ്വസിപ്പിക്കാൻ മലയാളി സമൂഹം ഒപ്പമുണ്ട്.
