ഡബ്ലിൻ – അയർലൻഡിലേക്ക് കുടിയേറുന്ന ആളുകളുടെ എണ്ണത്തിൽ കുറവ് രേഖപ്പെടുത്തിയതായി സെൻട്രൽ സ്റ്റാറ്റിസ്റ്റിക്സ് ഓഫീസ് (സി‌എസ്‌ഒ) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. 2025 ഏപ്രിൽ വരെയുള്ള 12 മാസത്തിനിടെ 1,25,300 പേർ അയർലൻഡിലേക്ക് കുടിയേറി. ഇത് മുൻവർഷത്തെ അപേക്ഷിച്ച് 16% കുറവാണ്.
എന്നിരുന്നാലും, തുടർച്ചയായി നാലാം വർഷവും രാജ്യത്തേക്ക് വരുന്നവരുടെ എണ്ണം ഒരു ലക്ഷത്തിലധികമാണ്. രാജ്യത്തേക്ക് വരുന്നവരുടെയും പുറത്തേക്ക് പോകുന്നവരുടെയും എണ്ണം തമ്മിലുള്ള അറ്റ വ്യത്യാസം (net migration) 59,700 ആണ്. ഇത് കഴിഞ്ഞ വർഷത്തെ അപേക്ഷിച്ച് ഏകദേശം 20,000 കുറവാണ്.
പുതിയ കുടിയേറ്റക്കാരിൽ 31,500 പേർ അയർലൻഡിലേക്ക് മടങ്ങിയെത്തിയ ഐറിഷ് പൗരന്മാരാണ്. കൂടാതെ, 25,300 പേർ മറ്റ് യൂറോപ്യൻ യൂണിയൻ പൗരന്മാരും, 4,900 പേർ യു.കെ. പൗരന്മാരും, ശേഷിക്കുന്ന 63,600 പേർ മറ്റ് രാജ്യങ്ങളിൽ നിന്നുള്ളവരുമാണ്.
സി‌എസ്‌ഒ കണക്കുകൾ പ്രകാരം, യുഎസിൽ നിന്ന് അയർലൻഡിലേക്ക് കുടിയേറുന്നവരുടെ എണ്ണത്തിൽ 96% വർദ്ധനവുണ്ടായി. 9,600 പേരാണ് യുഎസിൽ നിന്ന് ഇവിടേക്ക് വന്നത്.
അതേസമയം, 2020 ന് ശേഷം ആദ്യമായി അയർലൻഡിൽ നിന്ന് വിദേശത്തേക്ക് കുടിയേറുന്നവരുടെ എണ്ണത്തിൽ കുറവുണ്ടായി. 65,600 പേരാണ് രാജ്യം വിട്ടുപോയത്.
ജനസംഖ്യയിൽ 18,600 പേരുടെ സ്വാഭാവിക വർദ്ധനവ് രേഖപ്പെടുത്തി. 12 മാസത്തിനിടെ 54,400 ജനനങ്ങളും 35,800 മരണങ്ങളുമാണ് ഉണ്ടായത്. അയർലൻഡിന്റെ മൊത്തം ജനസംഖ്യ 78,300 വർദ്ധിച്ച് 54,58,600 ആയതായി സി‌എസ്‌ഒ അറിയിച്ചു.
കണക്കുകൾ അനുസരിച്ച്, 13,500 പേർ ഓസ്ട്രേലിയയിലേക്ക് കുടിയേറി. ഇത് 27% വർദ്ധനവാണ്. 2013-ന് ശേഷമുള്ള ഓസ്ട്രേലിയയിലേക്കുള്ള ഏറ്റവും ഉയർന്ന കുടിയേറ്റമാണിത്. കൂടാതെ, 6,100 പേർ യുഎസിലേക്ക് പോയി, ഇത് 22% വർദ്ധനവാണ്.
