അലാസ്ക∙ ലോകം ആകാംഷയോടെ ഉറ്റുനോക്കിയ യുഎസ്-റഷ്യൻ പ്രസിഡന്റുമാരുടെ അലാസ്ക ഉച്ചകോടിക്ക് നിരാശാജനകമായ പര്യവസാനം. യുക്രെയ്നിലെ സംഘർഷത്തിന് അറുതിവരുത്തുക എന്ന പ്രധാന ലക്ഷ്യത്തോടെ നടന്ന ചർച്ചകൾ ഫലം കാണാതെ പിരിഞ്ഞു. നിർണായകമായ വെടിനിർത്തൽ കരാറിലോ മറ്റ് ധാരണകളിലോ എത്താൻ അമേരിക്കൻ പ്രസിഡന്റ് ഡോണൾഡ് ട്രംപിനും റഷ്യൻ പ്രസിഡന്റ് വ്ലാഡിമിർ പുട്ടിനും സാധിച്ചില്ല.
ഏറെ പ്രതീക്ഷയോടെ അലാസ്കയിലെ ആങ്കെറിജിൽ നടന്ന ഉച്ചകോടി, മണിക്കൂറുകൾ നീണ്ട ചർച്ചകൾക്കൊടുവിലും ഇരുപക്ഷവും അവരവരുടെ നിലപാടുകളിൽ ഉറച്ചുനിന്നതോടെയാണ് പരാജയപ്പെട്ടത്. യുക്രെയ്നിൽ ഉടനടി വെടിനിർത്തൽ നടപ്പാക്കണമെന്നായിരുന്നു പ്രസിഡന്റ് ട്രംപിന്റെ പ്രധാന ആവശ്യം. എന്നാൽ, റഷ്യയ്ക്കെതിരായ സാമ്പത്തിക ഉപരോധങ്ങൾ പിൻവലിക്കുന്നതും റഷ്യയുടെ സുരക്ഷാ താൽപര്യങ്ങൾ അംഗീകരിക്കുന്നതും ഉൾപ്പെടെയുള്ള വിഷയങ്ങളിൽ വ്യക്തമായ ഉറപ്പ് ലഭിക്കാതെ വെടിനിർത്തലിന് തയ്യാറല്ലെന്ന കർശന നിലപാടിലായിരുന്നു പ്രസിഡന്റ് പുട്ടിൻ.
‘സമാധാനത്തിനുള്ള ഒരു അവസരമായിരുന്നു ഇത്, എന്നാൽ ചില കാര്യങ്ങളിൽ യോജിക്കാൻ സാധിച്ചില്ല. ചർച്ചകൾ തുടരു എന്ന് പ്രസിഡന്റ് ട്രംപ് മാധ്യമപ്രവർത്തകരോട് സംക്ഷിപ്തമായി പ്രതികരിച്ചു.
വെടിനിർത്തൽ എന്ന പ്രാഥമിക ലക്ഷ്യം നേടാനാകാതെ ഉച്ചകോടി അവസാനിച്ചത്, യുക്രെയ്നിലെ സംഘർഷം ഇനിയും നീണ്ടുപോകുമെന്ന സൂചനയാണ് നൽകുന്നത്. നയതന്ത്ര തലത്തിൽ ചർച്ചകൾക്കുള്ള വാതിലുകൾ പൂർണ്ണമായി അടഞ്ഞിട്ടില്ലെങ്കിലും, സമീപഭാവിയിൽ ഒരു സമാധാന ഉടമ്പടിക്കുള്ള സാധ്യതകൾക്ക് ഈ ഉച്ചകോടിയുടെ ഫലം മങ്ങലേൽപ്പിച്ചിരിക്കുകയാണ്. ആഗോള രാഷ്ട്രീയത്തിൽ നിർണായകമാകുമായിരുന്ന ഒരു കൂടിക്കാഴ്ച, അങ്ങനെപ്രതീക്ഷിച്ച ഫലം നൽകാതെ ചരിത്രത്തിന്റെ ഭാഗമാവുകയാണ്
