യൂറോപ്യന് രാജ്യമായ ഓസ്ട്രയയിലേക്ക് നോര്ക്ക റൂട്ട്സ് മുഖേന നഴ്സിങ് റിക്രൂട്ട്മെന്റ് പൈലറ്റ് പ്രോജക്ട് ആരംഭിക്കാന് ധാരണയായി. കേരള സര്ക്കാരിന് കീഴില് പ്രവര്ത്തിക്കുന്ന നോര്ക്ക റൂട്ട്സ് മുഖേന നിരവധി വിദേശ തൊഴില് റിക്രൂട്ട്മെന്റുകള് നടക്കാറുണ്ട്. ജര്മ്മനി, സഊദി അറേബ്യ, യു.കെ, തുര്ക്കി എന്നിവിടങ്ങളിലേക്കെല്ലാം ഇതിന് മുമ്പ് നഴ്സിങ് റിക്രൂട്ട്മെന്റ് നടന്നിട്ടുണ്ട്. ഇപ്പോള് ഓസ്ട്രിയയിലേക്കാണ് അവസരമുള്ളത്.
ഓസ്ട്രിയന് ട്രേഡ് കമ്മീഷണര് ആന്റ് കൊമേഴ്സ്യല് കൗണ്സിലര് ഹാന്സ് ജോര്ഗ് ഹോര്ട്ട്നാഗലിന്റെ നേതൃത്വത്തിലെത്തിയ പ്രതിനിധി സംഘവുമായി നോര്ക്ക റൂട്ട്സ് ചീഫ് എക്സിക്യൂട്ടീവ് ഓഫീസര് അജിത് കോളശ്ശേരിയുടെ നേതൃത്വത്തില് നടന്ന ചര്ച്ചയിലാണ് ധാരണയായത്.
പ്രതിവര്ഷം 7000 മുതല് 9000 നഴ്സിങ് പ്രൊഫഷണലുകള്ക്കാണ് നിലവില് ഓസ്ട്രിയയില് ഒഴിവുകള് റിപ്പോര്ട്ട് ചെയ്തിട്ടുള്ളത്. കെയര് ഹോം, ഹോസ്പിറ്റലുകള്, വയോജന പരിപാലത്തിനായുള്ള പ്രൈവറ്റ് ഹോം എന്നീ മേഖലകളിലാണ് ഒഴിവുള്ളത്. കേരളത്തില് നിന്നുള്ള നഴ്സുമാര് മികച്ച നൈപുണ്യമികവുള്ളവരാണെന്നും ഹാന്സ് ജോര്ഗ് ഹോര്ട്ട്നാഗല് അഭിപ്രായപ്പെട്ടു.
ഇതിന് മുമ്പ് ജര്മ്മനിയിലേക്ക് നഴ്സുമാരെ റിക്രൂട്ട് ചെയ്ത ട്രിപ്പിള് വിന് മാതൃകയില് ഓസ്ട്രിയയിലേക്കും റിക്രൂട്ട്മെന്റ് നടത്താനുള്ള സാധ്യതകളാണ് പരിശോധിക്കുമെന്ന് അജിത് കോളശ്ശേരി പറഞ്ഞു.
തൈക്കാട് നോര്ക്ക സെന്ററില് നടന്ന കൂടിക്കാഴ്ച്ചയില് തിരുവനന്തപുരം ഗവണ്മെന്റ് നഴ്സിങ് കോളജില് നിന്നും അസോസിയേറ്റ് പ്രൊഫസര്മാരായ റീന എ തങ്കരാജ്, ശോഭ പി.എസ്, സ്റ്റേറ്റ് ഇന്സ്റ്റിറ്റ്യൂട്ട് ഓഫ് മെഡിക്കല് എജ്യുക്കേഷന് ആന്ഡ് ടെക്നോളജി ഡയറക്ടര് ആശ എസ് കുമാര്, നോര്ക്ക റൂട്ട്സ് റിക്രൂട്ട്മെന്റ് മാനേജര് പ്രകാശ് പി. ജോസഫ്, ഹോം ഓതന്റിക്കേഷന് ഓഫീസര് സുഷമഭായി, മറ്റ് റിക്രൂട്ട്മെന്റ് വിഭാഗം പ്രതിനിധികള് എന്നിവര് സംബന്ധിച്ചു.
