അയർലൻഡിൽ ഭിന്നശേഷി വിഭാഗത്തിൽപ്പെടുന്ന 7,500 കുട്ടികൾ വിദഗ്ധ പരിചരണ സംഘങ്ങളുടെ ആദ്യ സമ്പർക്കത്തിനായി (First Contact) മാസങ്ങളായി കാത്തിരിക്കുകയാണെന്ന് ഹെൽത്ത് സർവീസ് എക്സിക്യൂട്ടീവിന്റെ (HSE) പുതിയ കണക്കുകൾ വ്യക്തമാക്കുന്നു. ചിൽഡ്രൻസ് ഡിസെബിലിറ്റി നെറ്റ്വർക്ക് ടീമുകളുടെ (CDNT) പക്കൽ രജിസ്റ്റർ ചെയ്ത കുട്ടികളുടെ കണക്കാണിത്. മാർച്ച് മാസാവസാനം 8,200 കുട്ടികളുണ്ടായിരുന്ന സ്ഥാനത്ത് ഏപ്രിൽ അവസാനത്തോടെ നേരിയ കുറവുണ്ടായെങ്കിലും, നിലവിലെ സാഹചര്യം ഒട്ടും ആശ്വാസകരമല്ല. കാത്തിരിക്കുന്നവരിൽ 4,776 കുട്ടികൾ (63 ശതമാനത്തിലധികം) ഒരു വർഷത്തിലേറെയായി ആദ്യ കൂടിക്കാഴ്ചയ്ക്കായി കാത്തിരിക്കുകയാണ്.
ഓക്കുപ്പേഷണൽ തെറാപ്പി, സ്പീച്ച് ആൻഡ് ലാംഗ്വേജ് തെറാപ്പി, ഫിസിയോതെറാപ്പി, സൈക്കോളജിക്കൽ പിന്തുണ എന്നിവ ഉൾപ്പെടുന്നതാണ് സിഡിഎൻടി സേവനങ്ങൾ. കുഞ്ഞുങ്ങളുടെ വളർച്ചയുടെ നിർണായക ഘട്ടത്തിൽ ഇത്തരം പരിചരണങ്ങൾ വൈകുന്നത് അവരുടെ ഭാവി വികസനത്തെയും പഠനത്തെയും പ്രതികൂലമായി ബാധിക്കുമെന്ന് വിദഗ്ധർ ചൂണ്ടിക്കാണിക്കുന്നു. മലയാളി കുടുംബങ്ങൾ ഉൾപ്പെടെ നിരവധി പ്രവാസി സമൂഹങ്ങൾ അയർലൻഡിലെ ഈ പൊതുജനാരോഗ്യ കാത്തിരിപ്പ് പട്ടിക മൂലം വലിയ പ്രയാസം നേരിടുന്നുണ്ട്.
മേഖല തിരിച്ചുള്ള കണക്കുകളിൽ വൻ വ്യത്യാസം
അയർലൻഡിലെ വിവിധ റീജിയണൽ ഹെൽത്ത്കെയർ ഏരിയകൾ (RHA) പരിശോധിക്കുമ്പോൾ തികച്ചും അസമമായ കണക്കുകളാണ് പുറത്തുവരുന്നത്. കാർലോ, കിൽകെന്നി, സൗത്ത് ടിപ്പററി, വാട്ടർഫോർഡ്, വെക്സ്ഫോർഡ്, വിക്ലോ എന്നിവ ഉൾപ്പെടുന്ന ‘എച്ച്എസ്ഇ ഡബ്ലിൻ സൗത്ത് ഈസ്റ്റ്’ മേഖലയിലാണ് ഏറ്റവും കൂടുതൽ കുട്ടികൾ കാത്തിരിപ്പിലുള്ളത് — 1,946 കുട്ടികൾ. ഇതിൽ 1,381 പേർ ഒരു വർഷത്തിലധികമായി ലൈനിൽ തുടരുന്നു.
ഡബ്ലിൻ സൗത്ത് സിറ്റി, സൗത്ത് വെസ്റ്റ്, കിൽഡെയർ, വെസ്റ്റ് വിക്ലോ, ലീഷ്, ഓഫ്ലി, ലോംഗ്ഫോർഡ്, വെസ്റ്റ്മീത്ത് എന്നിവ ഉൾപ്പെടുന്ന ‘എച്ച്എസ്ഇ ഡബ്ലിൻ മിഡ്ലാന്റ്സ്’ മേഖലയിൽ 1,933 കുട്ടികൾ കാത്തിരിക്കുന്നു, ഇതിൽ 1,423 പേർ ഒരു വർഷത്തിലേറെയായി കാത്തിരിക്കുന്നവരാണ്. നോർത്ത് ഡബ്ലിൻ, ലൂത്ത്, മീത്ത്, മോണഹാൻ, കവാൻ എന്നീ പ്രദേശങ്ങൾ ഉൾപ്പെടുന്ന ‘എച്ച്എസ്ഇ ഡബ്ലിൻ & നോർത്ത് ഈസ്റ്റ്’ മേഖലയിൽ 1,743 കുട്ടികളും (1,091 പേർ ഒരു വർഷത്തിലധികം), മിഡ്വെസ്റ്റ് മേഖലയിൽ (ക്ലെയർ, ലിമറിക്, നോർത്ത് ടിപ്പററി) 1,035 കുട്ടികളും കാത്തിരിപ്പിലാണ്. അതേസമയം ഡൊണഗൽ, സ്ലൈഗോ, ഗാൽവേ തുടങ്ങിയ പ്രദേശങ്ങൾ ഉൾപ്പെടുന്ന ‘എച്ച്എസ്ഇ വെസ്റ്റ് ആൻഡ് നോർത്ത് വെസ്റ്റ്’ മേഖലയിൽ വെറും 127 കുട്ടികൾ മാത്രമാണ് ഏപ്രിൽ അവസാനത്തോടെ ലിസ്റ്റിലുള്ളത്.
ജീവനക്കാരുടെ ക്ഷാമവും പരിഹാരശ്രമങ്ങളും
രാജ്യത്തുടനീളമുള്ള 93 സിഡിഎൻടി ടീമുകളിൽ അനുഭവപ്പെടുന്ന കടുത്ത ജീവനക്കാരുടെ ക്ഷാമമാണ് ഈ പ്രതിസന്ധിക്ക് പ്രധാന കാരണം. എച്ച്എസ്ഇ നേരിട്ട് 43 ടീമുകളെയും, എനേബിൾ അയർലൻഡ് (Enable Ireland) 20 ടീമുകളെയും, ബ്രദേഴ്സ് ഓഫ് ചാരിറ്റി 6 ടീമുകളെയും നയിക്കുന്നു. കഴിഞ്ഞ വർഷത്തെ റിപ്പോർട്ടുകൾ പ്രകാരം ഇത്തരം സംഘങ്ങളിൽ 18 ശതമാനം തസ്തികകൾ ഒഴിവുകിടക്കുകയായിരുന്നു, അതായത് 457 തസ്തികകളിൽ ആളില്ലായിരുന്നു.
എന്നാൽ ഈ സ്ഥിതി പരിഹരിക്കാനായി എച്ച്എസ്ഇ വലിയ റിക്രൂട്ട്മെന്റ് നടപടികൾ ആരംഭിച്ചിട്ടുണ്ട്. 2023 ഒക്ടോബറിന് ശേഷം 448 പുതിയ ജീവനക്കാരെ ഉൾപ്പെടുത്തി സ്റ്റാഫിംഗ് ശേഷി 28 ശതമാനം വർദ്ധിപ്പിക്കാൻ സാധിച്ചതായി എച്ച്എസ്ഇ വ്യക്തമാക്കി. നാഷണൽ സർവീസ് പ്ലാൻ പ്രകാരം നടപ്പുവർഷം 1,050 പുതിയ തസ്തികകൾ കൂടി സൃഷ്ടിച്ച് ഡിസെബിലിറ്റി മേഖലയിലെ ജീവനക്കാരുടെ ആകെ എണ്ണം 23,664 ആയി ഉയർത്താനാണ് ആരോഗ്യമന്ത്രാലയം ലക്ഷ്യമിടുന്നത്. കൃത്യസമയത്ത് ജീവനക്കാരെ നിയമിച്ചാൽ മാത്രമേ കുട്ടികൾക്ക് സമയബന്ധിതമായി പരിചരണം ഉറപ്പാക്കാൻ സാധിക്കൂ എന്ന് വിവിധ സംഘടനകൾ ആവശ്യപ്പെടുന്നു.
