അയർലണ്ടിലെ ദേശീയ റെയിൽവേ ശൃംഖലയായ ‘ഐൻറോഡ് ഏറൻ’ (Iarnród Éireann) കഴിഞ്ഞ വർഷം 3,500-ലധികം ട്രെയിൻ സർവീസുകൾ റദ്ദാക്കിയതായി ഔദ്യോഗിക കണക്കുകൾ പുറത്തുവന്നു. 2025-ൽ ആകെ നിശ്ചയിച്ചിരുന്ന 2,77,337 സർവീസുകളിൽ 3,504 ട്രെയിനുകളാണ് പൂർണ്ണമായോ ഭാഗികമായോ റദ്ദാക്കേണ്ടി വന്നത്. ട്രെയിനുകളുടെ യാന്ത്രിക തകരാറുകൾ, ജീവനക്കാരുടെ ക്ഷാമം, മോശം കാലാവസ്ഥ, റെയിൽവേ ട്രാക്കുകളിലെ സാമൂഹിക വിരുദ്ധ അക്രമങ്ങൾ എന്നിവയാണ് സർവീസുകൾ വൻതോതിൽ താളംതെറ്റാൻ കാരണമായത്. മലയാളി കമ്മ്യൂണിറ്റിയടക്കം അയർലണ്ടിൽ പ്രതിദിനം യാത്രയ്ക്കായി റെയിൽവേയെ ആശ്രയിക്കുന്ന ആയിരക്കണക്കിന് യാത്രികർക്ക് ഇത് വലിയ തിരിച്ചടിയായി.
പുറത്തുവന്ന കണക്കുകൾ പ്രകാരം റദ്ദാക്കപ്പെട്ട സർവീസുകളിൽ ഭൂരിഭാഗവും ഭാഗികമായി നിർത്തലാക്കപ്പെട്ടവയാണ് (Partially Cancelled). അതായത് 2,352 ട്രെയിനുകൾ യാത്രയുടെ പകുതിയിൽ വെച്ചോ നിശ്ചിത സ്റ്റേഷനുകളിൽ എത്തുന്നതിന് മുൻപോ യാത്ര അവസാനിപ്പിച്ചു. കൂടാതെ 1,152 സർവീസുകൾ സ്റ്റേഷനിൽ നിന്ന് പുറപ്പെടുന്നതിന് മുൻപ് തന്നെ പൂർണ്ണമായി റദ്ദാക്കുകയും ചെയ്തു (Fully Cancelled).
സാങ്കേതിക തകരാറുകളും പ്രവർത്തന തടസ്സങ്ങളും
ട്രെയിൻ സർവീസുകൾ തടസ്സപ്പെടാനുള്ള പ്രധാന കാരണം സാങ്കേതികവും യാന്ത്രികവുമായ തകരാറുകളാണ് (Mechanical Issues). ആകെ 1,642 സർവീസുകളെയാണ് യാന്ത്രിക തകരാറുകൾ ബാധിച്ചത്. ഇതിൽ 1,371 എണ്ണം ഭാഗികമായും 271 എണ്ണം പൂർണ്ണമായും റദ്ദാക്കപ്പെട്ടു. ട്രെയിനുകളുടെ എൻജിൻ തകരാർ, ഓട്ടോമാറ്റിക് ഡോറുകളുടെ പ്രശ്നങ്ങൾ, ടോയ്‌ലറ്റ് സംവിധാനങ്ങളിലെ തകരാറുകൾ, മറ്റ് പവർ സിസ്റ്റം തകരാറുകൾ എന്നിവ മൂലം യാത്രക്കാരുടെ സുരക്ഷ മുൻനിർത്തി സർവീസ് നിർത്തിവെക്കുകയായിരുന്നു.
ഓപ്പറേഷണൽ വിഭാഗത്തിലുണ്ടായ പ്രയാസങ്ങൾ കാരണം 1,161 സർവീസുകൾ റദ്ദാക്കപ്പെട്ടു (415 പൂർണ്ണമായും 746 ഭാഗികമായും). ആവശ്യത്തിന് ജീവനക്കാരില്ലാത്ത അവസ്ഥ (Staff Resourcing), ട്രാക്കുകളിലെ സിഗ്നൽ പോയിന്റ് തകരാറുകൾ, പവർ ഗ്രിഡിലെ (ESB) തടസ്സങ്ങൾ, ട്രാക്കിൽ ആളുകളോ മൃഗങ്ങളോ പ്രവേശിക്കുന്നത് തുടങ്ങിയവയാണ് ഓപ്പറേഷണൽ പ്രശ്നങ്ങൾക്ക് കാരണമായത്.
ചില ദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ കടുത്ത ട്രെയിൻ ഗതാഗത തടസ്സമാണ് അനുഭവപ്പെട്ടത്. ജൂലൈ 2-ന് കോർക്ക് (Cork) കൗണ്ടിയിൽ മാത്രം 11 സർവീസുകൾ റദ്ദാക്കി. ഇതിൽ കോബ് (Cobh), മിഡിൽട്ടൺ (Midleton) ലൈനുകളിലെ ട്രെയിനുകളും ഉൾപ്പെടുന്നു. ജൂലൈ 31-ന് ഡബ്ലിനിലെ പ്രധാന സ്റ്റേഷനായ കൊണോലിയിലേക്ക് (Connolly Station) സർവീസ് നടത്തേണ്ട 13 ട്രെയിനുകൾ റദ്ദാക്കി. ഇതിൽ ബെൽഫാസ്റ്റ്, ഡ്രോഗഡ (Drogheda) എന്നിവിടങ്ങളിലേക്കുള്ള ട്രെയിനുകൾ ഉൾപ്പെട്ടിരുന്നു. ഡിസംബർ 18-ന് കോർക്കിനും മാലോയ്ക്കും (Cork and Mallow) ഇടയിൽ മാത്രം ഒരൊറ്റ ദിവസം 42 സർവീസുകളാണ് റദ്ദാക്കേണ്ടി വന്നത്.
കാലാവസ്ഥ വ്യതിയാനവും ട്രെയിനുകൾക്ക് നേരെയുള്ള അക്രമങ്ങളും
മോശം കാലാവസ്ഥ മൂലം 631 സർവീസുകൾ റദ്ദാക്കപ്പെട്ടു. ഇതിൽ 466 എണ്ണം പൂർണ്ണമായും റദ്ദാക്കുകയായിരുന്നു. കൂടാതെ, ശരത്കാലത്തും തണുപ്പുകാലത്തും ട്രാക്കുകളിൽ ഇലകളും ഈർപ്പവും അടിഞ്ഞുകൂടി റെയിൽവേ ട്രാക്ക് തെന്നുന്ന അവസ്ഥ (Low rail adhesion) ഉണ്ടാകാറുണ്ട്. റോഡുകളിലെ ബ്ലാക്ക് ഐസിന് (Black Ice) സമാനമായ ഈ അപകടകരമായ അവസ്ഥ കാരണം 70 സർവീസുകൾ ഭാഗികമായി നിർത്തിവെച്ചു.
സർവീസ് റദ്ദാക്കലുകൾക്ക് പുറമേ, കഴിഞ്ഞ രണ്ട് വർഷത്തിനിടെ 7,500-ലധികം ട്രെയിനുകൾ അപ്രതീക്ഷിത കാരണങ്ങളാൽ മണിക്കൂറുകളോളം വൈകിയതായും കണക്കുകൾ വ്യക്തമാക്കുന്നു. ബോംബ് ഭീഷണികൾ, ചിലപ്പൊഴുണ്ടാകുന്ന ശക്തമായ സൂര്യപ്രകാശം ഡ്രൈവർമാരുടെ കാഴ്ച മറയ്ക്കുന്നത്, ട്രാക്കുകളിലേക്ക് കല്ലെറിയുന്ന സംഭവങ്ങൾ, വളർത്തുമൃഗങ്ങൾ ട്രാക്കിൽ കയറുന്നത് എന്നിവ കാരണം 2,000 മണിക്കൂറിലധികം സമയമാണ് നഷ്ടപ്പെട്ടത്.
റെയിൽവേ സ്റ്റേഷനുകളിലും ട്രെയിനുകളിലും ഉണ്ടാകുന്ന കുറ്റകൃത്യങ്ങളുടെയും അക്രമങ്ങളുടെയും എണ്ണത്തിൽ വലിയ വർദ്ധനവാണ് രേഖപ്പെടുത്തിയിരിക്കുന്നത്. 2025 ജനുവരി മുതൽ ജൂൺ വരെയുള്ള ആറു മാസത്തിനുള്ളിൽ മാത്രം 771 അക്രമ സംഭവങ്ങൾ റിപ്പോർട്ട് ചെയ്തു. അയർലണ്ടിലെ പൊതുഗതാഗത സംവിധാനം മെച്ചപ്പെടുത്താൻ കൂടുതൽ ജീവനക്കാരെ നിയമിക്കണമെന്നും റെയിൽവേ സ്റ്റേഷനുകളിൽ സുരക്ഷ ശക്തമാക്കണമെന്നും യാത്രക്കാർ ആവശ്യപ്പെടുന്നു.
