ബെൽഫാസ്റ്റിൽ വംശീയ കലാപം രൂക്ഷം; യാത്രാ ബസ്സും വീടുകളും അക്രമികൾ തകർത്തു, പ്രവാസികൾ കടുത്ത ഭീതിയിൽ

നോർത്തേൺ അയർലൻഡിന്റെ തലസ്ഥാനമായ ബെൽഫാസ്റ്റിൽ കുടിയേറ്റ വിരുദ്ധർ നടത്തുന്ന വംശീയ പ്രതിഷേധങ്ങൾ വൻ കലാപമായി മാറി. മുഖംമൂടി ധരിച്ച അക്രമിസംഘങ്ങൾ പൊതുഗതാഗത ബസ്സുകൾക്കും കാറുകൾക്കും തീയിടുകയും, കുടിയേറ്റക്കാർ താമസിക്കുന്ന വീടുകൾ ആക്രമിക്കുകയും ചെയ്തതോടെ നിരവധി കുടുംബങ്ങൾക്ക് പലായനം ചെയ്യേണ്ടി വന്നു. നഗരത്തിലുടനീളം അക്രമം പടർന്നതിനെ തുടർന്ന് നോർത്തേൺ അയർലൻഡ് പോലീസ് (PSNI) കടുത്ത അടിയന്തിര സാഹചര്യം (Critical Incident) പ്രഖ്യാപിച്ചിരിക്കുകയാണ്.

കഴിഞ്ഞ തിങ്കളാഴ്ച രാത്രി നോർത്ത് ബെൽഫാസ്റ്റിൽ ഉണ്ടായ ഒരു ക്രൂരമായ കത്തിക്കുത്ത് കേസിന് പിന്നാലെയാണ് നഗരത്തിൽ വംശീയ സംഘർഷങ്ങൾ പൊട്ടിപ്പുറപ്പെട്ടത്. 40 വയസ്സുകാരനായ ഒരു പ്രാദേശിക നിവാസിയെ 30 വയസ്സുകാരനായ സുഡാനി അഭയാർത്ഥി കത്തികൊണ്ട് തലയ്ക്കും കഴുത്തിനും മാരകമായി പരിക്കേല്പിക്കുകയായിരുന്നു. ഈ അക്രമത്തിന്റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചതോടെ, തീവ്ര വലതുപക്ഷ സംഘടനകൾ പ്രവാസികൾക്കെതിരെ പരസ്യമായ അക്രമത്തിന് ആഹ്വാനം ചെയ്യുകയായിരുന്നു. പ്രതിയെ വധശ്രമക്കേസ് ഉൾപ്പെടെയുള്ള വകുപ്പുകൾ ചുമത്തി പോലീസ് കോടതിയിൽ ഹാജരാക്കിയെങ്കിലും ജനരോഷം തണുപ്പിക്കാൻ കഴിഞ്ഞിട്ടില്ല.

പൊതുമുതലുകൾക്കും വീടുകൾക്കും നേരെ തീവെപ്പ്

ചൊവ്വാഴ്ച രാത്രിയോടെ ബെൽഫാസ്റ്റിന്റെ വിവിധ ഭാഗങ്ങളിൽ ഒത്തുകൂടിയ നൂറുകണക്കിന് വരുന്ന അക്രമിസംഘങ്ങൾ അഴിഞ്ഞാടുകയായിരുന്നു. ഈസ്റ്റ് ബെൽഫാസ്റ്റിലെ ന്യൂടൗൺആർഡ്സ് റോഡിൽ വെച്ച് അക്രമികൾ പൊതുജനങ്ങൾക്ക് സഞ്ചരിക്കാനുള്ള വലിയ ‘ഗ്ലൈഡർ’ (Glider) ബസ്സ് തടഞ്ഞുനിർത്തി പൂർണ്ണമായി തീയിട്ടു നശിപ്പിച്ചു. ഇതോടെ യാത്രാക്കാരുടെയും ജീവനക്കാരുടെയും സുരക്ഷ മുൻനിർത്തി ബെൽഫാസ്റ്റിലെ എല്ലാ ബസ്സ്, ട്രെയിൻ സർവീസുകളും പൊതുഗതാഗത വകുപ്പായ ട്രാൻസ്‌ലിങ്ക് (Translink) അടിയന്തിരമായി നിർത്തിവെച്ചു.

ഇതിന് പിന്നാലെ അക്രമങ്ങൾ സാധാരണക്കാരായ ജനങ്ങൾ താമസിക്കുന്ന തെരുവുകളിലേക്ക് പടർന്നു. ലെൻഡ്രിക് സ്ട്രീറ്റിൽ പാർക്ക് ചെയ്തിരുന്ന നിരവധി കാറുകൾക്ക് പ്രതിഷേധക്കാർ തീയിട്ടു. ഈ വാഹനങ്ങളിൽ നിന്ന് പടർന്ന വലിയ തീജ്വാലകൾ സമീപത്തെ സാധാരണ വീടുകളിലേക്ക് പടരുകയും വീടുകൾക്കുള്ളിൽ കറുത്ത പുക നിറയുകയും ചെയ്തു. വടക്കൻ അയർലൻഡ് ഫയർ ആൻഡ് റെസ്ക്യൂ സർവീസ് (NIFRS) ഉദ്യോഗസ്ഥർ കത്തുന്ന വീടുകൾക്കുള്ളിൽ പ്രവേശിച്ച്, അകത്തു കുടുങ്ങിപ്പോയ പ്രവാസി കുടുംബങ്ങളെ അതിസാഹസികമായാണ് പുറത്തെത്തിച്ചത്.

ഷാങ്കിൽ റോഡ്, ലിഗോണിയൽ റോഡ് എന്നിവിടങ്ങളിൽ വംശീയ ന്യൂനപക്ഷങ്ങൾ താമസിക്കുന്ന വീടുകളുടെ ജനലുകളും വാതിലുകളും അക്രമികൾ തല്ലിത്തകർത്തു. വിദേശികളുടേതായ വ്യാപാര സ്ഥാപനങ്ങളും ആഫ്രിക്കൻ സ്വദേശിയുടെ ഉടമസ്ഥതയിലുള്ള ഒരു സൂപ്പർമാർക്കറ്റും അക്രമികൾ കൊള്ളയടിക്കുകയും തീയിടുകയും ചെയ്തു. പോലീസിന് നേരെ പെട്രോൾ ബോംബുകളും കല്ലുകളും എറിഞ്ഞുകൊണ്ടാണ് അക്രമികൾ തെരുവ് യുദ്ധം നയിച്ചത്.

അടിയന്തിര വിഭാഗങ്ങൾ കടുത്ത സമ്മർദ്ദത്തിൽ

അക്രമങ്ങളുടെ വ്യാപ്തി ബെൽഫാസ്റ്റിലെ അഗ്നിശമന സേനയുടെയും പോലീസിന്റെയും നിയന്ത്രണങ്ങൾക്കും അപ്പുറമായിരുന്നു. വെറും അഞ്ച് മണിക്കൂറിനുള്ളിൽ 256 അടിയന്തിര ഫോൺ കോളുകളാണ് ഫയർ ഫോഴ്സ് കൺട്രോൾ റൂമിൽ ലഭിച്ചത്. നഗരത്തിലെ 62 വ്യത്യസ്ത സ്ഥലങ്ങളിലെ തീപിടുത്തങ്ങൾ നിയന്ത്രണവിധേയമാക്കാൻ വടക്കൻ അയർലൻഡിന്റെ മറ്റ് ഭാഗങ്ങളിൽ നിന്നായി 21 അധിക ഫയർ എഞ്ചിനുകൾ ബെൽഫാസ്റ്റിലേക്ക് എത്തിക്കേണ്ടി വന്നു. പോർട്ടഡൗൺ എന്ന സ്ഥലത്ത് പോലീസിന്റെ വണ്ടിക്കും അക്രമികൾ തീയിട്ടു.

ഭീരുത്വമെന്ന് രാഷ്ട്രീയ നേതൃത്വം

ബെൽഫാസ്റ്റിൽ നടക്കുന്ന അക്രമങ്ങളെ നോർത്തേൺ അയർലൻഡിന്റെ രാഷ്ട്രീയ നേതൃത്വം ഒന്നടങ്കം അപലപിച്ചു. അക്രമികൾ കാണിക്കുന്നത് ശുദ്ധമായ ഭീരുത്വവും ഗുണ്ടായിസവുമാണെന്ന് ഫസ്റ്റ് മിനിസ്റ്റർ മിഷേൽ ഒ നീൽ പറഞ്ഞു. പാവപ്പെട്ട കുടുംബങ്ങളെ അവരുടെ വീടുകളിൽ നിന്ന് തീയിട്ട് പുറത്താക്കുന്നത് വംശീയ വെറിയാണെന്നും ഇതിന് ഒരു ന്യായീകരണവുമില്ലെന്നും അവർ വ്യക്തമാക്കി. ഒരാൾ ചെയ്ത കുറ്റത്തിന് പ്രവാസി സമൂഹത്തെ ഒന്നടങ്കം വേട്ടയാടുന്നത് അംഗീകരിക്കാൻ കഴിയില്ലെന്ന് ഡെപ്യൂട്ടി ഫസ്റ്റ് മിനിസ്റ്റർ എമ്മ ലിറ്റിൽ-പെൻഗെല്ലിയും കൂട്ടിച്ചേർത്തു.

ബ്രിട്ടീഷ് പ്രധാനമന്ത്രി കീർ സ്റ്റാർമർ കത്തിക്കുത്ത് സംഭവത്തെ അപലപിച്ചതിനൊപ്പം തെരുവിൽ അക്രമം നടത്തുന്നവർക്കെതിരെ കർശന നടപടി സ്വീകരിക്കാൻ പോലീസിന് നിർദ്ദേശം നൽകിയിട്ടുണ്ട്. കലാപം പടർത്താൻ ബോധപൂർവ്വം ചിലർ സോഷ്യൽ മീഡിയ വഴി ശ്രമിക്കുന്ന സാഹചര്യത്തിൽ അക്രമത്തിന്റെ ദൃശ്യങ്ങൾ ആരും പങ്കുവെക്കരുതെന്ന് അധികൃതർ കർശന നിർദ്ദേശം നൽകിയിട്ടുണ്ട്. മലയാളികൾ ഉൾപ്പെടെയുള്ള പ്രവാസി സമൂഹം അതീവ ജാഗ്രത പാലിക്കണമെന്നും അത്യാവശ്യ കാര്യങ്ങൾക്കല്ലാതെ പുറത്തിറങ്ങരുതെന്നും പ്രാദേശിക കൂട്ടായ്മകൾ അറിയിച്ചിട്ടുണ്ട്.