അയർലൻഡിലെ ഇമിഗ്രേഷൻ സർവീസ് ഡെലിവറി (ISD) തങ്ങളുടെ ഓപ്പറേഷണൽ നടപടിക്രമങ്ങളിൽ അടിയന്തിരവും സുപ്രധാനവുമായ മാറ്റം വരുത്തി. വിസ, റെസിഡൻസി, പൗരത്വം (Citizenship) തുടങ്ങിയ ആവശ്യങ്ങൾക്കായി തപാൽ മാർഗ്ഗം അയക്കുന്ന അധിക രേഖകൾക്കോ കത്തുകൾക്കോ ഇനി മുതൽ വകുപ്പിൽ നിന്നും പ്രത്യേകം കൈപ്പറ്റ് രസീതുകളോ (Acknowledgement letters) ഇമെയിലുകളോ അയക്കില്ലെന്ന് അധികൃതർ വ്യക്തമാക്കി. നിലവിൽ കെട്ടിക്കിടക്കുന്ന ലക്ഷക്കണക്കിന് അപേക്ഷകളിൽ വേഗത്തിൽ തീരുമാനമെടുക്കുന്നതിനായി ജീവനക്കാരെFrontline ഫ്രണ്ട്‌ലൈൻ കേസുകളിലേക്ക് പുനർവിന്യസിക്കുന്നതിന്റെ ഭാഗമായാണ് ഈ അപ്രതീക്ഷിത പരിഷ്കാരം.
കഴിഞ്ഞ കുറച്ചുകാലമായി അയർലൻഡിലേക്ക് എത്തുന്ന വിദേശ തൊഴിലാളികളുടെയും വിദ്യാർത്ഥികളുടെയും എണ്ണത്തിൽ ഉണ്ടായ വൻ വർദ്ധനവ് കാരണം ഇമിഗ്രേഷൻ വകുപ്പിൽ വലിയ രീതിയിലുള്ള അപേക്ഷകളുടെ പെരുപ്പമാണ് അനുഭവപ്പെടുന്നത്. പല അപേക്ഷകളിലും തീരുമാനമാകാൻ 12 ആഴ്ചയിലധികം സമയമെടുക്കുന്നുണ്ട്. ഈ സാഹചര്യത്തിലാണ് ഓഫീസ് പശ്ചാത്തല ജോലികൾ ലഘൂകരിക്കാൻ വകുപ്പ് തീരുമാനിച്ചത്. തപാൽ വഴി വരുന്ന കത്തുകൾക്ക് മറുപടി തയാറാക്കുന്ന സമയം ലാഭിച്ച്, ആ ജീവനക്കാരെ അപേക്ഷകൾ പരിശോധിച്ച് തീർപ്പാക്കാൻ നിയോഗിക്കുന്നതിലൂടെ അപേക്ഷകളുടെ കാത്തിരിപ്പ് കാലാവധി ഗണ്യമായി കുറയ്ക്കാൻ സാധിക്കുമെന്നാണ് ഇമിഗ്രേഷൻ വകുപ്പ് കണക്കുകൂട്ടുന്നത്.
പുതിയ നിയമപ്രകാരം, നിങ്ങൾ അയക്കുന്ന രേഖകൾ നിങ്ങളുടെ ഫയലിനൊപ്പം കൃത്യമായി ചേർക്കുകയും പരിശോധിക്കുകയും ചെയ്യും. എന്നാൽ അത് ഞങ്ങൾക്ക് കിട്ടി എന്ന തരത്തിലുള്ള യാതൊരുവിധ സ്ഥിരീകരണവും ഔദ്യോഗികമായി ഇനി മുതൽ അയക്കുന്നതല്ല. അപേക്ഷകളുടെ നിലവിലെ അവസ്ഥ (Status updates) അറിയാൻ വേണ്ടി അയക്കുന്ന കത്തുകൾക്കും ഈ നിയമം ബാധകമാണ്.
ഈ മാറ്റം അപേക്ഷകരിൽ വലിയ ആശങ്ക ഉണ്ടാക്കാൻ സാധ്യതയുള്ളതിനാൽ, ഇമിഗ്രേഷൻ വകുപ്പ് ചില പ്രധാന നിർദ്ദേശങ്ങൾ മുന്നോട്ട് വെച്ചിട്ടുണ്ട്:
- രജിസ്റ്റേർഡ് പോസ്റ്റ് ഉപയോഗിക്കുക: പാസ്പോർട്ട്, വിവാഹ സർട്ടിഫിക്കറ്റ് പോലുള്ള ഒറിജിനൽ രേഖകൾ തപാലിൽ അയക്കേണ്ടി വരുന്നവർ നിർബന്ധമായും ‘രജിസ്റ്റേർഡ് പോസ്റ്റ്’ (Registered Post) സംവിധാനം മാത്രം ഉപയോഗിക്കുക. തപാൽ വകുപ്പ് നൽകുന്ന ട്രാക്കിംഗ് നമ്പർ (Tracking Number) ഉപയോഗിച്ച് രേഖകൾ ഇമിഗ്രേഷൻ ഓഫീസിൽ എത്തിയോ എന്ന് അപേക്ഷകർ സ്വയം ഉറപ്പുവരുത്തണം. രജിസ്റ്റേർഡ് തപാൽ ആണെങ്കിൽ പോലും ഐ.എസ്.ഡി പ്രത്യേകം രസീത് നൽകില്ല.
- കസ്റ്റമർ സർവീസ് പോർട്ടൽ ഉപയോഗിക്കുക: രേഖകളുടെ പകർപ്പുകൾ (Copies) അയക്കാൻ തപാൽ സംവിധാനം പരമാവധി ഒഴിവാക്കി ഇമിഗ്രേഷൻ വകുപ്പിന്റെ ഓൺലൈൻ ‘കസ്റ്റമർ സർവീസ് പോർട്ടൽ’ ഉപയോഗിക്കുക. ഓൺലൈൻ വഴി അപ്‌ലോഡ് ചെയ്യുന്ന രേഖകൾ വേഗത്തിൽ ഫയലുകളിലേക്ക് മാറാൻ സഹായിക്കും.
- ആദ്യമേ പൂർണ്ണമായ അപേക്ഷ നൽകുക: അപേക്ഷകൾ സമർപ്പിക്കുന്ന ആദ്യ ഘട്ടത്തിൽ തന്നെ ആവശ്യമായ എല്ലാ രേഖകളും കൃത്യമായി ഉൾപ്പെടുത്താൻ ശ്രദ്ധിക്കുക. ഇത് പിന്നീട് കത്തുകൾ അയക്കേണ്ടി വരുന്ന സാഹചര്യം ഒഴിവാക്കും.
അയർലൻഡിൽ ജോലി ചെയ്യുന്ന വിദേശ മലയാളി ജീവനക്കാർക്കും കെയറർമാർക്കും വിദ്യാർത്ഥികൾക്കും ഈ തീരുമാനം വലിയ രീതിയിൽ ബാധകമാണ്. വിസ പുതുക്കലിനായി രേഖകൾ അയക്കുമ്പോൾ കമ്പനികളിലോ സ്ഥാപനങ്ങളിലോ റൈറ്റ്-ടു-വർക്ക് (Right to work) തെളിയിക്കാൻ മുൻപ് ഇമിഗ്രേഷൻ കത്തുകൾ ഉപയോഗിച്ചിരുന്നു. ഇനി മുതൽ അതില്ലാത്തതിനാൽ, ഓൺലൈൻ പോർട്ടലിൽ രേഖകൾ സമർപ്പിച്ചതിന്റെ ടൈം-സ്റ്റാമ്പ് സ്ക്രീൻഷോട്ടുകളും തപാൽ ട്രാക്കിംഗ് റെക്കോർഡുകളും സൂക്ഷിച്ചുവെക്കാൻ നിയമവിദഗ്ദ്ധർ നിർദ്ദേശിക്കുന്നു.
