ഗാൽവേ റോഡിലെ ലൈറ്റൺ മോറിസൺ (49) ജയിലിൽ; വീണ്ടും കുറ്റം ചെയ്യാൻ സാധ്യത കൂടുതലെന്ന് പ്രൊബേഷൻ റിപ്പോർട്ട്
കാസിൽബാർ, അയർലൻഡ് – രണ്ട് യുവതികളെ ലൈംഗികമായി പീഡിപ്പിക്കുകയും കുട്ടികളെ ലൈംഗികമായി ദുരുപയോഗം ചെയ്യുന്ന ദൃശ്യങ്ങൾ കൈവശം വെക്കുകയും ചെയ്ത കേസിൽ ബാലെ അധ്യാപകന് ഏഴ് വർഷം തടവ് ശിക്ഷ.
ഗാൽവേ റോഡിലെ ട്യൂം സ്വദേശിയായ ലൈറ്റൺ മോറിസൺ (49) ആണ് പ്രതി. ഇയാൾ മയോ, ഗാൽവേ കൗണ്ടികളിലായി മൂന്ന് ഡാൻസ് സ്കൂളുകൾ നടത്തിയിരുന്നു. കാസിൽബാർ സർക്യൂട്ട് കോടതിയാണ് ശിക്ഷ വിധിച്ചത്. എട്ട് വർഷത്തെ തടവിന് ശിക്ഷിച്ച കോടതി, അതിൽ അവസാനത്തെ ഒരു വർഷം സസ്പെൻഡ് ചെയ്തു.
2023 ജനുവരി മുതൽ 2024 ജൂൺ വരെയുള്ള കാലയളവിൽ നടത്തിയ 13 കുറ്റകൃത്യങ്ങളിൽ ആറ് എണ്ണത്തിൽ ഇയാൾ കുറ്റം സമ്മതിച്ചിട്ടുണ്ട്. എട്ട് വയസ്സുകാരിയെയും ഒൻപത് വയസ്സുകാരിയെയും ലൈംഗികമായി പീഡിപ്പിച്ചു, കുട്ടികളെ ചൂഷണം ചെയ്തു, കുട്ടികളുടെ ലൈംഗിക ദുരുപയോഗ ദൃശ്യങ്ങൾ കൈവശം വെയ്ക്കുകയും നിർമ്മിക്കുകയും ചെയ്തു തുടങ്ങിയ കുറ്റങ്ങളാണ് ഇയാൾക്കെതിരെ ചുമത്തിയത്.
അനുചിതമായ വസ്ത്രങ്ങൾ ധരിപ്പിച്ച ശേഷം കോസ്റ്റ്യൂം സൂക്ഷിക്കുന്ന മുറിയിൽ വെച്ച് കുട്ടികളെ പീഡിപ്പിക്കുന്നതിന്റെ ദൃശ്യങ്ങൾ മോറിസൺ റെക്കോർഡ് ചെയ്തതായി കോടതിയെ അറിയിച്ചു.
പ്രതിക്ക് വീണ്ടും കുറ്റം ചെയ്യാനുള്ള സാധ്യത വളരെ കൂടുതലാണെന്നും കുട്ടികളുമായി മേലിൽ മേൽനോട്ടമില്ലാത്ത ഇടപെഴകാൻ അനുവദിക്കരുതെന്നും പ്രൊബേഷൻ റിപ്പോർട്ടിൽ പറയുന്നു. മോറിസൺ ജയിലിൽ എത്രനാൾ കിടന്നാലും ഒരു പീഡോഫൈൽ ആയി തന്നെ തുടരുമെന്നും കുട്ടികൾക്ക് വലിയ അപകടകാരിയാണെന്നും വിധി പറഞ്ഞ ജഡ്ജി ഇയോയിൻ ഗാരവൻ നിരീക്ഷിച്ചു. പ്രതിയുടെ ലൈംഗിക സംതൃപ്തിക്കായി പീഡന ദൃശ്യങ്ങൾ റെക്കോർഡ് ചെയ്തത് അതീവ ഗുരുതരമായ കുറ്റമാണെന്നും കോടതി വ്യക്തമാക്കി.
ബാലെ ക്ലാസിന് ശേഷം മകൾക്ക് അസ്വസ്ഥത കണ്ടതിനെ തുടർന്ന് പിതാവ് ശ്രദ്ധിച്ചപ്പോഴാണ് 2024 മാർച്ചിൽ സംഭവം പുറത്തറിയുന്നത്. സ്കൂളിൽ നടന്ന ‘സ്റ്റേ സേഫ്’ പ്രോഗ്രാം വഴി ലഭിച്ച അറിവ് കാരണം കുട്ടിക്ക് മോശം പെരുമാറ്റം തിരിച്ചറിയാൻ കഴിഞ്ഞിരുന്നു.
