അസ്ഥിരമായ അവസ്ഥയിലും ഐറിഷ് കാർ വിപണിയിൽ അയർലണ്ടിലെ ഫോക്സ്വാഗൺ ഉപഭോക്താക്കൾക്ക് സന്തോഷവാർത്ത. കൂടുതൽ ഉപഭോക്തൃ കേന്ദ്രീകൃത സമീപനം വാഗ്ദാനം ചെയ്തുകൊണ്ട് ഫോക്സ്വാഗൺ ഗ്രൂപ്പ് അയർലൻഡ് 2026 മുതൽ ഒരു ഫ്യൂച്ചർ സെയിൽസ് മോഡലിലേക്ക് മാറുകയാണ്. ഫോക്സ്വാഗൺ, സ്‌കോഡ, സിയറ്റ്, കുപ്ര, വിഡബ്ല്യു വാണിജ്യ വാഹനങ്ങൾ, ഓഡി വാഹനങ്ങൾ എന്നിവയിൽ മാറ്റം വരുത്തുമെന്ന് ഫോക്സ്വാഗൺ ഗ്രൂപ്പ് അയർലൻഡ് അറിയിച്ചു. ഫ്യൂച്ചർ സെയിൽസ് മോഡലിന് കീഴിൽ ഒരു പുതിയ കാർ വാങ്ങുന്നതിനുള്ള മുഴുവൻ പ്രക്രിയയും ഡിജിറ്റലൈസ് ചെയ്യുമെന്ന് ഫോക്സ്വാഗൺ പറഞ്ഞു. ഉപഭോക്താക്കൾക്ക് കാർ ഷോറൂമിലെ ഫിസിക്കൽ പർച്ചേസുകൾ, ഓൺലൈനിൽ ഡിജിറ്റൽ പർച്ചേസുകൾ, അല്ലെങ്കിൽ ഇവ രണ്ടിന്റെയും മിശ്രിതം എന്നിവയിൽ നിന്ന് തിരഞ്ഞെടുക്കാനാകും. ഓൺലൈൻ പർച്ചേസുകൾ ഡീലർമാർ ഉപഭോക്താക്കൾക്കുമേൽ ഇപ്പോൾ അടിച്ചേൽപിച്ച് വരുന്ന ഹാൻഡ്ലിങ് ചാർജ്ജുകൾ ഇല്ലാതാക്കുമെന്നാണ് കരുതുന്നത്. മറ്റ് യൂറോപ്യൻ വാഹനനിർമാതാക്കളും ഇതേ പാത പിന്തുടരുമെന്നാണ് പ്രതീക്ഷിക്കുന്നത്. ടെസ്ല ഇതിനോടക്കം ഓൺലൈൻ സെയിലുകളിലാണ് ശ്രദ്ധ കേന്ദ്രീകരിക്കുന്നത്.
മറുവശത്ത്, ചൈനീസ് ഇലക്ട്രിക് വാഹനങ്ങൾ (ഇവികൾ) ഐറിഷ് വിപണിയിൽ കാര്യമായ തടസ്സം നേരിടുന്നു. ചൈനീസ് ഇവികൾക്ക് മൾട്ടി-ബില്യൺ-യൂറോ താരിഫ് ചുമത്താനുള്ള യൂറോപ്യൻ യൂണിയന്റെ തീരുമാനം അവയുടെ താങ്ങാനാവുന്ന വിലയെയും ലഭ്യതയെയും ബാധിച്ചേക്കാം. ചില കമ്പനികൾക്ക് 38.1% വരെ താരിഫ് ഉള്ളതിനാൽ, കുറഞ്ഞ ചിലവിൽ ചൈനീസ് ഇവികൾ ഉയർത്തുന്ന മത്സരത്തിൽ നിന്ന് യൂറോപ്യൻ വാഹന നിർമ്മാതാക്കളെ സംരക്ഷിക്കാൻ ലക്ഷ്യമിട്ടാണ് ഈ നീക്കം. ഈ താരിഫുകളുടെ അനന്തരഫലങ്ങൾ ഐറിഷ് ഉപഭോക്താക്കൾക്കുള്ള വൈവിധ്യമാർന്ന ഇവി ഓപ്ഷനുകളിൽ കുറവുണ്ടാക്കുകയും അയർലണ്ടിലെ മൊത്തത്തിലുള്ള ഇവി മാർക്കറ്റ് ഡൈനാമിക്സിനെ സ്വാധീനിക്കുകയും ചെയ്യും.
