കഴിഞ്ഞ കുറച്ചു ദിവസങ്ങളായി അയർലൻഡിൽ ആഞ്ഞടിച്ച അറ്റ്‌ലാന്റിക് കാറ്റ് രാജ്യത്തെ കാറ്റാടിയന്ത്രങ്ങളെ (Wind Turbines) അതിവേഗം കറക്കിയപ്പോൾ ഒരു അപൂർവ്വ പ്രതിഭാസം ഉണ്ടായി. ഗ്രിഡിലെ മൊത്തവ്യാപാര (Wholesale) വൈദ്യുതി വില പകുതിയിലധികം കുറഞ്ഞ് മെഗാവാട്ട്-അവറിന് (MWh) ശരാശരി 94 യൂറോ എന്ന നിരക്കിലേക്ക് താഴ്ന്നു. അതേസമയം, കാറ്റില്ലാത്ത സാധാരണ ദിവസങ്ങളിൽ, വിദേശത്തുനിന്നും ഇറക്കുമതി ചെയ്യുന്ന വിലകൂടിയ ഫോസിൽ ഇന്ധനങ്ങളെ ആശ്രയിക്കേണ്ടി വന്നപ്പോൾ ഇതേ വൈദ്യുതിയുടെ വില ഇരട്ടിയായി, അതായത് 179 യൂറോയായി വർദ്ധിച്ചു.
എന്നാൽ, പ്രകൃതി കനിഞ്ഞു നൽകിയ ഈ കുറഞ്ഞ നിരക്കിലുള്ള ഹരിത ഊർജ്ജത്തിന്റെ (Green Energy) പ്രയോജനം അയർലൻഡിലെ സാധാരണക്കാരായ കുടുംബങ്ങൾക്ക് ലഭിക്കുന്നില്ല എന്നതാണ് യാഥാർത്ഥ്യം. രാജ്യത്തെ പുതിയ ‘ക്ലൈമറ്റ് ചേഞ്ച് അഡ്വൈസറി കൗൺസിൽ’ (CCAC) പുറത്തുവിട്ട 2026-ലെ വാർഷിക റിപ്പോർട്ട് പ്രകാരം, അടിസ്ഥാന സൗകര്യങ്ങളുടെ പോരായ്മയും ഡാറ്റാ സെന്ററുകളുടെ (Data Centres) അമിതമായ വൈദ്യുതി ഉപയോഗവും കാരണം ഐറിഷ് ജനതയ്ക്ക് ഈ കുറഞ്ഞ ബില്ലുകളുടെ ആനുകൂല്യം പൂർണ്ണമായും നഷ്ടപ്പെടുകയാണ്. നിലവിൽ യൂറോപ്യൻ യൂണിയനിൽ തന്നെ ഏറ്റവും ഉയർന്ന ഗാർഹിക വൈദ്യുതി നിരക്ക് നൽകുന്നത് അയർലൻഡിലാണ്. ഇതിന്റെ ഫലമായി രാജ്യത്തെ 3,19,000 കുടുംബങ്ങളാണ് നിലവിൽ വൈദ്യുതി ബില്ലുകൾ അടച്ചുതീർക്കാൻ കഴിയാതെ കുടിശ്ശികയിലായിരിക്കുന്നത് (Arrears) എന്ന് റിപ്പോർട്ട് ചൂണ്ടിക്കാട്ടുന്നു.
കൗൺസിൽ ചെയർമാൻ അലക്സ് വൈറ്റ് സമർപ്പിച്ച ഈ റിപ്പോർട്ട് പ്രകാരം, അയർലൻഡിന്റെ വൈദ്യുതി വിതരണ ശൃംഖലയ്ക്ക് ആവശ്യമായ മാറ്റങ്ങൾ വരുത്താൻ സർക്കാരിന് സാധിക്കുന്നില്ല. ഔദ്യോഗിക കണക്കുകൾ പ്രകാരം കഴിഞ്ഞ വർഷം വൈദ്യുതി മേഖലയിൽ നിന്നുള്ള കാർബൺ പുറന്തള്ളൽ 8.9 ശതമാനം കുറഞ്ഞിട്ടുണ്ട്. കൂടാതെ 2025 ജൂൺ മാസത്തോടെ അയർലൻഡ് പൂർണ്ണമായും കൽക്കരി രഹിത (Coal-free) ഗ്രിഡ് സംവിധാനം കൈവരിക്കുകയും ചെയ്തു.
പക്ഷെ, ഇതിന്റെ മറുവശം ആശങ്കാജനകമാണ്. സർക്കാരിന്റെ 2030-ലെ കാലാവസ്ഥാ കർമ്മ പദ്ധതി (Climate Action Plan) വിജയിക്കണമെങ്കിൽ ഓരോ വർഷവും കുറഞ്ഞത് 2 ഗിഗാവാട്ട് (GW) എങ്കിലും പുതിയ കാറ്റ്-സൗരോർജ്ജ സംവിധാനങ്ങൾ നിർമ്മിക്കേണ്ടതുണ്ട്. എന്നാൽ കഴിഞ്ഞ വർഷം വെറും 0.8 ഗിഗാവാട്ട് മാത്രമാണ് കൂട്ടിച്ചേർക്കാൻ കഴിഞ്ഞത്. ഈ മന്ദഗതിയിലുള്ള വികസനം മൂലം അയർലൻഡിന് ഇപ്പോഴും വിദേശ ഇന്ധനങ്ങളെ ആശ്രയിക്കേണ്ടി വരുന്നു. മിഡിൽ ഈസ്റ്റിൽ തുടരുന്ന യുദ്ധങ്ങളും സംഘർഷങ്ങളും ആഗോള എണ്ണ-ഗ്യാസ് വിപണിയിൽ വലിയ വിലക്കയറ്റം ഉണ്ടാക്കുമ്പോൾ അതിന്റെ ഭാരം മുഴുവൻ ഐറിഷ് ജനങ്ങളുടെ തലയിലാണ് വന്നുചേരുന്നത്.
ഇനി ആവശ്യത്തിന് കാറ്റടിച്ചാൽ പോലും അത് പൂർണ്ണമായി ഉപയോഗിക്കാൻ അയർലൻഡിലെ നിലവിലെ ഇലക്ട്രിക്കൽ ഗ്രിഡിന് ശേഷിയില്ല. കഴിഞ്ഞ വർഷം ഉത്പാദിപ്പിച്ച ഹരിത ഊർജ്ജത്തിന്റെ 10 ശതമാനവും പൂർണ്ണമായി പാഴായിപ്പോയെന്ന് (Wasted Wind) കൗൺസിൽ വ്യക്തമാക്കുന്നു. ഇതിനെ ‘ഡിസ്പാച്ച്-ഡൗൺ’ (Dispatch-down) എന്നാണ് വിളിക്കുന്നത്. ഉത്പാദിപ്പിക്കുന്ന വൈദ്യുതി ആവശ്യക്കാരിലേക്ക് എത്തിക്കാനുള്ള ലൈനുകളുടെ ശേഷിക്കുറവ് കാരണം കാറ്റാടി മില്ലുകൾ നിർത്തിവെക്കാൻ കമ്പനികൾ നിർബന്ധിതരാകുന്നു. 2016-ന് ശേഷമുള്ള ഏറ്റവും ഉയർന്ന ഊർജ്ജ പാഴാക്കലാണിത്.
അടിസ്ഥാന സൗകര്യങ്ങളുടെ കുറവിനൊപ്പം വൻകിട ആഗോള ടെക്നോളജി കമ്പനികളുടെ ഡാറ്റാ സെന്ററുകൾ വരുത്തിവെക്കുന്ന ബാധ്യതയും വലുതാണ്. യൂറോപ്പിലെ ശരാശരി വൈദ്യുതി ആവശ്യകത കഴിഞ്ഞ വർഷം 1 ശതമാനം മാത്രം ഉയർന്നപ്പോൾ അയർലൻഡിൽ അത് 2.6 ശതമാനമാണ് വർദ്ധിച്ചത്. 2015-ൽ രാജ്യത്തെ ആകെ വൈദ്യുതിയുടെ 5 ശതമാനം മാത്രം ഉപയോഗിച്ചിരുന്ന ഡാറ്റാ സെന്ററുകൾ ഇന്ന് 20 ശതമാനത്തിലധികം വൈദ്യുതിയാണ് വിഴുങ്ങുന്നത്. പുതിയ വിൻഡ് ഫാമുകൾ നിർമ്മിക്കുന്നതിലൂടെ ഉണ്ടാകുന്ന ലാഭം മുഴുവൻ ഈ ഡാറ്റാ സെന്ററുകൾ ഉപയോഗിച്ചു തീർക്കുന്നതിനാൽ സാധാരണക്കാരുടെ ബില്ലുകൾ ഉയർന്ന നിലയിൽ തന്നെ തുടരുന്നു.
സാധാരണക്കാരായ ജനങ്ങൾ ഈ സാമ്പത്തിക ബാധ്യത പേറാതിരിക്കാൻ സർക്കാർ ‘ക്രിട്ടിക്കൽ ഇൻഫ്രാസ്ട്രക്ചർ ബിൽ 2026’ വേഗത്തിൽ നടപ്പിലാക്കണമെന്ന് കൗൺസിൽ ആവശ്യപ്പെടുന്നു. ഗ്രിഡ് നവീകരണ പ്രോജക്റ്ററ്റുകൾക്ക് കൃത്യമായ സമയപരിധിയും ഉത്തരവാദിത്തവും നിശ്ചയിക്കണം. ‘ഫ്രണ്ട്സ് ഓഫ് ദി എർത്ത്’ (Friends of the Earth) പോലുള്ള സംഘടനകൾ ആവശ്യപ്പെടുന്നത് പാവപ്പെട്ട കുടുംബങ്ങളെ സംരക്ഷിക്കാൻ സർക്കാർ പ്രത്യേക എനർജി ക്രെഡിറ്റുകൾ നൽകണമെന്നാണ്. ഭാവിയിൽ ഉണ്ടാകാൻ സാധ്യതയുള്ള മോശം കാലാവസ്ഥകളെ പ്രതിരോധിക്കാനും വൈദ്യുതി നിരക്കുകൾ കുറയ്ക്കാനും ഗ്രിഡ് നവീകരണം അടിയന്തിരമായി നടത്തേണ്ടതുണ്ട്.
